內地青年求職不易，例如非名校畢業生可能會直接被HR篩走，研究生亦可能會因為本科學歷唔夠輝煌而被嫌棄。咁老細同HR眼中嘅「海歸精英」係唔係就一定會搵到一份人工高、待遇好，而且睇落光鮮亮麗嘅絕世筍工呢？最近內地網上流傳一張截圖，圖中名單顯示一名畢業於哈佛大學嘅研究生獲聘為官方留學服務中心嘅合約工，唔少網民都認為咁高嘅學歷配呢份工作，實在係大材小用。不過留學服務中心嘅工作人員就話，呢名高材生係睇中中心嘅發展潛力！
網上流傳嘅名單係「中國（教育部）留學服務中心2023年面向社會公開招聘擬錄用人員公示」。中國留學服務中心係中國教育部直屬事業單位，主要從事出國留學、留學回國同來華留學等服務，不過公告嘅標題寫住係呢個職位係「非事業編制」，即係受聘員工只係合約工或臨時工，並唔係大眾趨之若鶩嘅公務員鐵飯碗。
雖然唔係正式公務員職位，獲聘用嘅求職者亦唔會得到北京戶口，但呢份工作嘅招聘門檻一啲都唔低，求職者需要有碩士研究生及以上學歷，專業不限，留學回國人員優先，英語熟練，可以以英語為工作語言……
留學服務中心嘅公告顯示，崗位1嘅擬聘用人員為女性，畢業院校為美國哈佛大學。根據當初嘅招聘公告，獲聘者嘅工作內容包括調研、宣傳中國高等教育、維護來華留學管理服務系統，以及收集同整理關於留學中國嘅數據。
哈佛畢業生自然符合留學服務中心嘅招聘條件，不過大部分網民都理解唔到點解堂堂哈佛高材生會屈就一個非公務員職位，有人仲質疑呢位碩士係唔係真係喺哈佛畢業。
面對大家嘅質疑，留學服務中心嘅工作人員都有出嚟解畫：「崗位1的聘用人員確實是哈佛大學畢業，還是正規的碩士研究生畢業。她比較認可我們單位的業務發展方向，覺得有發展潛力。」
工作人員亦提到，有唔少世界名牌大學嘅畢業生都有應聘，因為佢哋都係留學生，而留學服務中心本來就係做同留學相關嘅工作，應聘者可能覺得比較適合佢哋。今時今日周圍都世界難撈，畢業有offer已經唔容易，但原來國家仍然對海外名牌大學畢業生需求若渴，唔怪得內地咁多有錢人千方百計都要送仔女出國留學啦！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
