情侶app嘅出現能夠滿足熱戀中嘅小情侶對儀式感同安全感嘅需求，例如拍拖嘅每一日都可以打卡留念，又可以通過定位、步數紀錄掌握另一半嘅動向，甚至連手機嘅屏幕解鎖紀錄都會成為情侶間嘅共享資訊。不過如果想用情侶app維繫感情，可能要先做好課金嘅心理準備。
課金成為永久會員 真係用到成世？
好多時情侶之間send訊息問對方「食飯未」、「喺邊啊」、「做緊咩」只係一句甜蜜嘅問候，但情侶app嘅出現成功將呢啲問候變成白紙黑字嘅紀錄，亦為商家帶來賺錢嘅機會。大部分情侶app會提供免費嘅實時定位顯示功能，不過如果用戶仲想知道埋另一半今日行咗幾多步路、睇咗幾多次手機、電話係唔係就嚟冇電，只要肯俾錢註冊會員，情侶app都可以滿足到你嘅好奇心。
註冊會員嘅費用有平有貴，貴啲嘅可能收¥28/7日，平啲嘅只需¥30/年，仲有啲app會提供永久會籍，收費由¥19.9到¥288不等。其實商家願意提供服務，用戶願意畀錢，雙方你情我願，只要唔涉及隱藏收費，睇落都冇咩大問題，但「永久會員」呢種竭澤而漁嘅收費方式，喺互聯網行業往往被視為對未來缺乏預期同規劃以及準備捲款走佬嘅先兆。
情侶每日打卡任務：長撳手機22分鐘
為咗增加下載量及日活躍用戶數，部分平台會用獎品、獎金作招徠，鼓勵情侶每日上線打卡。不過好多用戶喺堅持咗一段時間後先發現，打卡嘅任務變得越來越複雜，開放打卡嘅時段亦被縮短，導致佢哋好容易就會打卡失敗，例如一款名為「愛情銀行」嘅應用程式曾經以「連續打卡一年可獲1,000元現金」為噱頭吸納新用戶，但後期嘅打卡任務難度極高，情侶雙方需同時長按螢幕60秒先可以成功打卡，其後任務時間更延長至520秒（約9分鐘）同1314秒（約22分鐘），搞到用戶怨聲載道，最後愛情銀行喺2019年應監管部門要求被下架。
如果偶爾miss咗打卡都唔緊要，因為部分「貼心」嘅平台有售賣補打卡嘅道具「補簽卡」，每張補簽卡嘅售價大概係十幾二十蚊左右。不過越接近領取大獎嘅日子，補打卡所需要用到嘅道具就越多，甚至可能要用幾十張道具先可以補返一次打卡。試想像你同另一半已經打咗335日嘅卡，你哋只需要堅持多一個月就可以拎到終極大獎，點知你今日唔小心miss咗打卡……為咗平息另一半嘅怒火，你會唔會乖乖地畀呢一筆「愛情保護費」？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
