香港特區政府前財政司司長曾俊華在社交媒體發交講述親身經歷美斯表演賽的失望與影響。球迷期待美斯上場，卻遭遇他未上場的情況，引發觀眾不滿，甚至成為國際事件。曾俊華指事件上升至政治層面可能對香港的國際聲譽產生影響，並分享他過往在波士頓觀賞體育賽事的經驗。
曾俊華指美斯訪港本來是一個受到香港人支持和喜愛的盛事，但最終卻以噓聲結束，還演變成了國際事件。他認為如果將這件事升華到政治層面，將不可避免地影響到香港在國際間的聲譽，這是香港社會需要關注，並回憶起2003年皇馬來香港作表演賽的情景，當時他也有入場觀看，他提到那支球隊的陣容非常強大，讓他覺得今生無憾。
以下是曾俊華社交媒體帖文全文
各位老友，恭喜發財！
呢兩日，大家一定係四出拜年、同親友聚會、睇煙花，甚至過兩日入大球場，睇國際同本港足球名宿踢賀歲盃。我知，講起入大球場睇波，唔少球迷可能仲一肚氣，尤其是係一眾美斯迷啦。
上個禮拜六，我喺母校喇沙打完劍，下晝返屋企，點知一出銅鑼灣地鐵站，就發現周圍都係塞滿晒人，一睇就知道大家都係準備去大球場，睇國際邁阿密足球隊，公開練習嘅粉紅、粉藍兵團。當日美斯都有出場練波，一眾球迷自然有所期待。期待嘅，包括準備多時入場睇波嘅我。
上周日嘅表演賽，下晝四點先至開波，我都好神心，提早兩點幾，就已經入場，當時都差唔多已經坐滿咗半個場。
難得美斯再嚟香港，況且呢次可能係我最後一次，可以親眼睇佢喺球場上演出，所以一早就已經安排好。講真，我覺得啲飛嘅價錢真係相當貴，但係咁難得有呢個機會，同其他香港朋友，一齊參與呢場盛事，我就覺得好幸運。
喺大球場坐喺我隔離嘅，係我老友記 Donald 同佢太太，佢本身都好鍾意睇波，所以當日佢都睇得好投入，我同時發現，坐喺我哋周圍嘅觀眾裡面，好多都係講普通話嘅人，相信佢哋好多都係特別從內地嚟香港，希望可以一睹美斯嘅風采。
喺開波前有 Gareth T、姜濤同 Anson Lo 表演暖場，跟住見到｢萬人迷｣碧咸現身；上半場港隊喺輸咗一球嘅情況下，補返一粒，大家心情都覺得非常興奮，同時熱切期望，美斯可以喺下半場出場踢幾腳。
觀眾好早就開始大叫 Messi! Messi! 點知到下半場後備球員出哂嚟熱身，仲未見美斯起身，大家開始覺得唔妥。到完場前十分鐘，美斯仲係著住件外套，同我哋一齊睇波，大家終於頂唔順，大叫「回水！」，包括我在內！
問心嗰句，賽前真係冇一刻諗過，美斯會唔落場扭幾下波，更加冇諗過，佢一句聲都冇出過，所以我同在場絕大部份美斯擁躉一樣，覺得非常失望。
最後主辦單位決定退番一半票價畀大家，我諗至少會令失望嘅球迷冇咁谷氣，但冇得睇美斯落場獻技嘅遺憾，就無法彌補啦。
本來係大家非常支持同喜歡嘅盛事，最後喺噓聲下收場，仲要演變成國際事件，好事變壞事，點解好似近年屢見不鮮呢？不過，如果郁下就將事件提升至政治層面，咁就無可避免，一定會影響到香港喺國際間嘅名聲啦，呢方面我哋係要留意嘅。
呢次美斯來香港，應該係繼 SARS 之後，皇馬來香港作表演賽，最受港人歡迎同接受嘅盛事。2003 年我都有入場睇皇馬，哨牙仔、卡路士，施丹、費高、碧咸同魯爾呢個「6條A」可一不可再嘅陣容，睇過嘅朋友都會覺得今生無憾。
其實去現埸睇任何體育賽事，都會令人熱血沸騰，好似以前我住喺 Boston 嗰陣，久不久我都會去到當時嘅Boston Garden，入場睇 Boston 支籃球隊 Celtics 打波。籃球場相對較細，所以現場氣氛好勁，作為觀眾，我哋更加可以清楚睇到球員比賽嗰時嘅情況，幾乎佢哋流幾多滴汗，都睇得一清二楚。之不過，入場睇比賽嘅門票，就確實一啲都唔平啦，嗰時我成日都講笑，話每一次睇一晚波，就差唔多要再抵押自己間屋，雖然比賽係好刺激，好好睇，但係就唔能夠成為習慣，唔係就會好傷荷包嘅。
#美斯陪睇波
#有份叫回水
#好事可唔可以唔好變壞事來自 John Tsang 曾俊華帖子的相片
更多曾俊華近期言論
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
