兩代財政司司長罕見隔空駁火。上任財爺曾俊華周末在社交媒體發文稱，最新一份財政預算案令大眾憂慮香港將要借貸度日，若然陷入｢債冚債｣境地，香港庫房「包唔駛幾耐就乾塘」，現屆財政司長辦公室是先即日回應指，發債所得資金全數用於投資基礎建設和工務工程， 陳茂波周一在電台節目再作進一步反駁，稱曾俊華任內的港府停止造地、基建投入不足、土地供應不足，令到市民只能「呆望」樓價上升。
本文整合陳茂波及曾俊華兩任財政司司長就住財政預算案2024/25的言論，並探討香港財政預算對香港經濟未來的影響。
曾俊華對陳茂波最新一份財案評價
曾俊華Faacbook圖片
上周「財爺」陳茂波在財政預算案中披露年度綜合赤字預計高達1,016億元，是連續第二年財赤達到千億規模，引發上任「財爺」曾俊華對香港財政前景的擔憂。曾俊華在社交媒體發文指，歷任財政司司長常被人稱為｢守財奴｣，不過事隔多年以後，他相信社會大眾終於明白歷任「掌櫃」的用意何在。
曾俊華在文中提到，陳茂波在財政預算案2024/25中提出的薪俸稅標準稅率設兩級制及住宅物業累進差餉，「兩樣加埋一年增加嘅收入都唔夠20億」，對香港千億千億財政赤字來說僅是杯水車薪，並指出政府發行的債券利率需達到4、5厘才能吸引投資者，可能難以找到足夠回報的投資項目。
若然政府｢債冚債｣支付日常開支，香港庫房「唔駛幾耐就乾塘」，而庫房空虛會拖累香港信用評級，同時為了支付債務利息，屆時加稅、加費只會陸續，緊接住的公共服務縮水都是由香港的後代子孫去承受。曾俊華在文尾更將財政問題推上法律層面，稱「如果我哋唔想辦法搞番好盤數，任由結構性財赤，長此下去，呢個係咪同《基本法》對特區公共財政要量入為出嘅要求相符呢？」
曾俊華2024一月初已指香港進入結構性赤字
今次已非曾俊華首次撰文提及香港財赤問題，他在今年一月份的社交媒體文章都有提到「我哋已經進入結構性赤字嘅年代，如果我哋要擺脫『赤的疑惑』，返回《基本法》所講嘅量入為出正常狀態，除咗要諗點樣增加收入……我係好明白，可以用嘅工具確實係唔多，而每一個工具都會帶嚟唔少痛苦，喺今日嘅情況，最傳統嘅方法，都係要向支出方面入手，諗盡辦法，點樣可以喺唔會對民生造成重大影響嘅前題下，減少開支，以前我哋叫呢啲做「放血」。
Cut 開支，意味可能會影響到公務員嘅人數，或者一啲社會服務，呢個一定係痛苦同唔會受歡迎嘅措施，之不過再唔做嘢，香港日後可能會好似美國咁，要借貸度日，呢個對現今呢代人影響有限，但係下一代又點呢？將呢個 『 還債 』 重擔，交畀下一代，甚至乎下幾代人，又係咪公平呢？」
財政司長辦公室即晚反駁曾俊華
就住曾俊華的言論，財政司長辦公室先是在周日晚上向本地媒體作出回應，強調特區政府嚴守財政紀律，財政預算案已清楚指出，發債所得資金，全數用於投資基礎建設和工務工程， 不會用在經常性開支，包括北部都會區、及污水處理廠等其他基建和工務工程項目，確保土地供應充足，以及持續改善公共和社區設施。 辦公室強調項目可為香港帶來的經濟和社會效益，包括提升香港的競爭力和改善市民的生活環境，對整體社會至關重要。
公共財政方面，預算案中提出一套財政整合計劃，包括管控公共開支的增速、繼續推行公務員編制零增長、檢視政府基本工程的緩急優次，經營帳目預計2年後，即2026至27年度起恢復收支平衡，而綜合帳目在未計及發債下，也會於3年後，即27至28年度恢復收支平衡。
陳茂波周一在電台上為財案辯護
財政司司長陳茂波至周一（3月4日）在新城電台節目中反駁曾俊華凡擔憂，重申政府經營帳目在兩年後將達到收支平衡及政府發行債券所得的資金不會用於日常開支以外，他指政府儲備尚超過7,000億元，不急於發行債券，而是會「審時度勢」因應利息變化決定發債時間。
他進一步解釋指，政府發售予市民的零售債券利率較高，而發售予機構投資者的債券利率則一般較低，但仍然吸引了不少銀行和保險機構投資，強調他接觸到的評級和金融機構，以至專業投資者和金融市場人士都認為政府發行債券是吸納市場資金的有效途徑，市民無需對港府發債有所擔心。
陳茂波回擊曾俊華任內房屋供應不足 市民只能「呆望」樓價上升
陳茂波甚至回擊曾俊華任職財政司司長期間，本港樓價由2007年至2016年錄得多達2倍升幅，皆因時任港府領導層停止造地、基建投入不足、土地供應不足，令到市民只能「呆望」樓價上升，「今時今日我哋係絕對唔容許咁嘅情況出現」，今屆政府掌握土地供應主導權，將確保房屋供應充足，「（市民）捱樓價飛升嘅苦唔會再出現」。昔日港府引入引入辣招是因為樓宇供應不足，現時已有充足供應，政府才有「底氣」撤辣亦不會令樓價急升。
更多陳茂波相關報導
財金高官狂派樓市定心丸 陳茂波、余偉文否認有Call Loan潮
財政預算案2024｜封面晨曦色即年度顏色Peach Fuzz柔和桃？
曾俊華抨擊《財政預算案2024/25》的Facebook文章全文
自問我都算係一個樂觀嘅人，但係當你見到自己頭家，財政狀況每況愈下，都咪話唔擔心，主要唔係擔心我哋呢啲有番咁上下年資嘅一代人，而係會繼續喺香港生活嘅年輕一代人。
以前幫香港睇住盤數嘅人，畀人鬧得最多嘅，有可能就係叫佢哋做｢守財奴｣，當然包括我在內啦，我哋都會成日被人批評，留住咁多錢喺庫房做乜呢？我諗咁多年後，相信大家終於明白歷任掌櫃嘅用意啦。我諗我同好多朋友一樣，睇完最新一份財政預算案，最令大家憂慮嘅，就係香港將要借貸度日。
無可否認，香港已經正式進入結構性財政赤字年代，政府自然要尋求開源之道，節流之法啦。最理想就係經濟暢旺，政府所有嘅稅收都大豐收，賣地又理想，咁就唔駛搞咁多其他嘢，但呢個景象，恐怕有一段時間都未必可以會重現。
正如我之前同大家講過，歷任財爺在位之時，大家曾經都諗爆頭，想過所有可以增加政府收入嘅方法，加稅加費就當然啦，但係諗過，度過，都諗唔到有乜措施係唔會帶嚟極大痛苦嘅，全部都係唔容易實行。正如搞標準稅率設兩級制同住宅物業累進差餉，兩樣加埋一年增加嘅收入都唔夠 20 億，我哋依家面對緊係千幾億嘅債，呢啲根本係杯水車薪。
全世界好多地方嘅政府，的而且確都以發債嚟支持政府嘅經常運作，所以先會有人認為債務佔 GDP 嘅一成多都唔係大問題，但係香港只係一個地方特區，又唔可以同有啲地方咁，可以大量印錢紙，所以拎香港嚟同其他國家相比，似乎就唔係太適合。
要知道，我哋永遠唔可以用借返嚟嘅錢，用嚟應付日常開支，如果你發債，係用嚟做一啲大型嘅基建投資項目，等落成後有長期嘅經濟回報，咁樣係冇問題嘅，但係如果連年發債，然後係用嚟支付日常開支，以至用｢債冚債｣，香港個荷包唔駛幾耐就乾塘。庫房空虛有乜後果？首先，我哋嘅信用評級必然會有影響，從外國嘅經驗就睇到，為咗支付債務利息，加稅加費就會陸續有嚟，然後各項公共服務大縮水，呢啲都會由子子孫孫去承受。
何況依家仍然處於高息年代，推出嘅債券冇番四、五厘息，都未必吸引到買家，佢哋不如放喺銀行，都有咁嘅回報呀嘛，但係當你要還咁高嘅利息嗰時，你將借來嘅錢，喺出面做投資，係咪咁容易可以攞到至少十厘嘅回報去支持呢？諗來諗去，都真係好難諗得掂。
講到尾，我哋唔可以只係睇收入嗰部分，一定要減低政府嘅支出，當然包括經常開支，我哋亦都要留意埋啲非經常性開支，好似基建項目咁，否則我哋永遠都走唔出結構性財赤。如果我哋唔想辦法搞番好盤數，任由結構性財赤，長此下去，呢個係咪同《基本法》對特區公共財政要量入為出嘅要求相符呢？
#量入為出 #家貧萬事哀
更多曾俊華相關報導
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
