關公妹專欄｜為咗Coverage你可以去到幾盡？

無論做咗PR幾多年，相信各位PR都會對「記者會冇記者」、「新聞稿冇media出」、「pitch唔到訪問」感到壓力。關公妹做咗咁多年，即使知道單嘢有angle，都依然會忐忑，怕有咩突發事影響coverage。

話說有次活動嘅前一晚，執物資已經搞到夜晚10點幾，話咁快就夠鐘call記者confirm attendance喇。可能日頭已經忙到一頭煙，到夜晚仲要不停call記者，同事們啲夜間亢奮出晒嚟，平時話自己I人嗰幾個，都變晒E人，開始廢話大會 ⋯⋯

同事：「其實活動本身冇乜gimmick，真係未必吸引到記者嚟。如果可以放風話有特別嘉賓出席引記者嚟，你哋覺得講邊個嚟先夠noise？」

成班同事開始圍爐發噏瘋！

關公妹：「一係就唔講，一講梗係講特首啦！港聞一定嚟！電視、電台、文字乜都有齊！雖然都未必會停低扑咪，但起碼個場面墟冚！不過ff下好喇，我哋聽日冇啲有分量嘅嘉賓，call埋收工啦！」

Call咗成晚，有兩個media話會出席，我哋已經好感恩喇！但心入面都係會擔心有啲咩突發嘢，令到記者會甩底……

活動當日，說好會到嘅記者仲未到，就喺阿客係咁追問記者幾時到嘅時候，嚟咗一位港聞記者，亦係當時全場唯一一位記者！其實本身呢個media嘅採主覆咗冇人手會到，但而家竟然有記者出現咗，佢嘅出現，就好似超級英雄拯救地球咁有型！

港聞記者：「想confirm下，一陣特首幾點到達？」

呢個時候我同同事四目交投，心諗唔通公司俾media竊聽？我哋尋晚亂噏成真？但講返正經先，特首嚟我哋冇可能唔知㗎喎！

關公妹：「唔好意思！啱啱問咗主辦方，真係冇特首會出席嘅資料呀。」

港聞記者：「但行家真係咁講，唔緊要啦，我照喺度等吓！」

因為相信記者行家，結果佢真係喺度等足一日，直到活動完結。而等嘅期間佢仲順便做咗兩個訪問，成為咗我哋當日嘅救命恩人之一。

收工之後同同事食宵夜……

關公妹：「其實咩行家玩嘢啊？呢個活動點會請到特首呀？佢自己又唔嚟，但係又叫人哋嚟！不過都要多謝阿行家今日幫咗我哋多兩個coverage，仲要係訪問！正呀！」

同事：「嗯……其實個行家係咪你？」

關公妹：「喂！拍戲咩？新聞女王定係竊聽風雲呀？咪癲啦！」

👩‍💼關公妹筆記💼

個個公關都想跑到coverage，唔通個個公關都跑到coverage咩？想要editorial免費報道就自然要冒冇media報嘅風險。Coverage唔係一分耕耘就一分收穫，而係十分努力同十分幸運，做好哂準備之後，只好等緣份，緣份到了coverage自然會來～