前財政司司長曾俊華昨日在社交平台發文，就香港經濟現況及復甦策略提出見解。他指出，儘管通關已有一段時間,但香港經濟仍未見顯著改善。文中提到有來自商界的政界人士反映，不少中小企及市民因銀行收緊貸款而面臨財務困境；同時，建築業界亦向政府求助，希望增加外判合約以協助業界渡過難關。
前財政司司長曾俊華：旅遊業難撐香港經濟 應聚焦商貿物流
對於近期本港大力推動旅遊業及舉辦盛事的做法，曾俊華認為成效有限。他指出,旅遊業僅佔香港本地生產總值(GDP)約5%至6%，難以有效推動整體經濟。相反，商務、貿易及物流業佔GDP四成，他建議應從這方面著手振興經濟。
供應鏈升級：提升香港競爭力的新方向
曾俊華提到,他最近出席了一場由麻省理工學院校友會舉辦的晚宴，主講嘉賓為該校管理學院教授Charlie Fine。Fine教授專研供應鏈及價值鏈管理，主張為傳統物流供應鏈管理增值。曾俊華認為，香港應在這方面升級，以提升與其他主要港口的競爭力。
曾俊華社交網絡全文
香港經濟有幾好？我諗大家只要落街行下，四圍睇下就會感受到。之前主要係零售同飲食業叫苦連天，但係我最近見到有來自商界嘅政界朋友，喊住咁話，唔少中小企同市民，因為銀行收緊貸款，可能會捱唔到落去，同時，亦有建築界老行尊向政府求救，佢話唔少建築師行，正在掙扎求存，希望政府推出多啲外判合約，幫助業界渡過難關。
通關都已經有一段時間，之前我哋大力推旅遊，搞盛事，但畢竟旅遊業佔香港 GDP 嘅比重，只有百分之五至六左右，對推動香港整體嘅經濟，作用當然係有限啦。反之商務同貿易及物流，就佔香港 GDP 嘅四成，要搞活番香港經濟，點解唔先從呢方面入手呢？
早前我就去咗一個由母校 MIT 舊生組織嘅晚宴，主人家邀請咗 MIT Sloan School of Management 嘅教授 Professor Charlie Fine做主講嘉賓。呢餐飯吸引我，因為 Professor Fine 係供應鏈 supply chain 同 value chain 價值鏈兩方面嘅專家，佢嘅主張，基本上係為傳統物流供應鏈管理上再增值。香港都應該要喺呢方面再升級，先至能夠同世界其他嘅主要港口競爭。
競爭令人疲累，所以我仍然會不時去尋找一啲，可以俾心靈平靜嘅節目。前排，我就去咗香港公園嘅茶藝館，欣賞南音演奏家杜泳，同兩位學唱南音嘅心光學校學生，一齊演唱南音。
或者依家唔係咁多人聽南音，因為南音嘅曲子冇乜起伏，對一般人嚟講，可能會比較悶，但係南音呢種用廣府話說唱嘅曲藝，喺 20 世紀初嘅時候，喺香港係相當流行。可能因為嗰個年代娛樂比較少喇，加上南音主要都係說唱民間故事，對於當時冇乜機會讀書嘅人嚟講，聽南音，就好似聽收音機咁，能夠知道社會上發生嘅事，係幾有娛樂性嘅。
後嚟，南音逐漸被粤劇吸收，甚至逐漸被其他大眾娛樂所取代，日漸式微。南音雖然已經被列入為香港非物質文化遺產，但係佢單調平淡嘅說唱方式，要呢門表演技藝傳承落去，的確會係相當困難。
不過，我覺得，講廣東話嘅社會，自然包括香港喇，真係好應該搵方法，令呢種表演藝術，可以繼續承傳落去，唔好比佢成為絶響。
更多盛事經濟相關報導
更多曾俊華經濟相關報導
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
