前財政司司長曾俊華近日在Facebook帖文指近期香港有關｢中東王子｣的爭議，令他回憶起自己當年與商界朋友考察中東時的一段趣事。當時曾俊華沙特極具人氣的沙特王子HRH Prince Alwaleed bin Talal會面，當時對方雄心勃勃，計劃興建一座全球最高的大樓，但最終那位被譽為「中東股神」的王子因打貪而被軟禁在酒店。
他直言，中東地區周圍都是沙漠，「我哋真係要搞清楚我哋投資嘅目標係乜」。曾俊華認為，香港最吸引外國投資者的地方在於普通法和低稅率，只要營造良好的投資環境，家族辦公室自然會來。他提醒說，若想吸引更多家族辦公室落戶，首先必須明確目的和效果，才能有針對性地部署。
John Tsang 曾俊華Fcaebook完整帖文
近排，好多人提及｢中東王子｣呢個話題，有朋友就走嚟問我，其實呢啲家族辦公室對我哋嘅經濟，有幾大嘅好處呢?
無論如何，有新資金投放喺香港，當然係好事，而香港最吸引外國投資者嘅地方，就係我哋使用嘅普通法，比做生意嘅人有多一啲確定性，我哋嘅低稅率，投資生意賺到錢，畀盡都係交十幾個巴仙利得稅；喺呢度做金融交易，即使資本投資賺咗錢，增咗值又唔駛交稅，我哋更加冇增值稅，買嘢食飯都唔使交多一層稅，所以我始終認為，只要我哋做好香港嘅投資環境，制訂吸引嘅稅務安排同政策，保持香港原有嘅生活方式，呢啲家族辦公室就自然會嚟。
老實講，香港一向都有唔少富貴家族，呢啲家族一早就有自己設立嘅辦公室，去做唔同嘅投資，增長家族嘅財富，有啲會將家族嘅資產交畀 Private Banker，私人銀行家，協助投資同管理資產，但係呢啲私人銀行家收取嘅管理費用相當高，所以市場上會有啲聯合家族辦公室 multi-family office，一個專業團隊，同時集中投資管理多個家族嘅財富。如果我哋想吸引更多家族辦公室嚟香港，我哋首先要搞清楚我哋究竟希望達到啲乜嘢目的？想收到乜嘢嘅效果？例如係咪可以吸引佢哋投資喺香港嘅企業呢？可以為香港增加幾多個就業職位呢？係咪會租地方開設實體嘅辦公室呢？當我哋有清楚嘅目標，我哋先至可以有針對性咁，去做工作，咁就會更加有效。
近期有關｢中東王子｣真真假假嘅爭議，令我想起以前做財政司司長嘅時候，我都曾經同一班商界朋友，一齊去考察中東幾個城市，仲同當時人氣迫人嘅沙特王子 HRH Prince Alwaleed Bin Talal 會面，仲去咗佢嗰間誇張到令人嘩然嘅大宅作客。當時佢雄心壯志，希望可以大展拳腳，亦曾經計劃過興建一座全球最高嘅大樓，之不過後嚟今日嘅王儲上位之後，沙特政府就以打貪之名，一度將呢位｢中東股神｣軟禁喺酒店，呢位王子最終成為呢場政治鬥爭嘅大輸家。
近日聽到好多人話去中東投資，其實嗰度周圍都係沙漠，滿眼都係黃泥沙，我哋真係要搞清楚我哋投資嘅目標係乜。
前兩日我去中環置地廣場，睇咗喺本港出生、以比利時為創作基地嘅藝術家龍家昇Kasing Lung 嘅《Everybody knows》作品展，佢嘅畫作色彩繽紛，比沙漠嘅景色就有趣得多，令人感受到開心快樂嘅感覺。Kasing 從Leonard Cohen呢首三十幾年前嘅舊作，取得靈感，正如歌裡面其中一句歌詞：Everybody knows that the dice are loaded，眾所周知所有事情，係受人操控，早已注定，人其實係冇乜可以選擇，正如富有嘅人，會繼續家財萬貫，貧窮嘅人，會繼續囊空如洗。
Kasing 依家同家人，長時間喺歐洲生活，當地近年面對持續不斷嘅難民潮，佢嘅囡囡都有問爸爸，點解會有咁多難民想嚟呢度生活呢？佢就向女兒解釋，上個世紀各國冷戰時期結束之後，全世界享受咗幾十年大致上和平嘅日子，但係依家四處戰火不斷，都唔知幾時，先至可以再次回復靜好嘅歲月，所以佢都藉住呢個展覽，希望可以傳遞歡樂、愛同埋和平嘅信息。
#中東王子我真係見過
更多中東相關報導
一文整合南方東英沙特阿拉伯ETF（2830）持股、特點、風險
誰先介入以巴衝突？施永青：中東係中美較量戰場，但係…︱股壇C見
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
