接任香港佛山社團總會會長的鄭志剛（Adrian），繼 6 月初帶隊去佛山進行產業考察後，日前再現身中環雪廠街的私人會所 Gentry Club，親自主持一場約 50 人的 Cocktail Reunion，同一眾 AI 及 DeepTech 創科 Founders 交流。
剃鬚戴幼金屬框 揀平民佳釀顯「識睇數」
Adrian 當日以一身清爽嘅「剃鬚 Look」亮相，精神相當爽利。熱衷時尚潮流嘅佢，今次戴咗副幼身金屬框眼鏡，迎合近期時尚流行嘅「Geek Chic」復古知性 style，成個造型幾有新鮮感。
佢下身繼續貫徹個人風格，腳踏 Adidas YEEZY BOOST 系列波鞋，睇嚟 Adrian 對呢系列潮鞋依然相當長情。而睇返今次嘅酒水安排，就選用咗單支市價幾百蚊嘅小眾名牌法國紅白酒招呼賓客，性價比高又絕不失禮，睇嚟佢依家真係「更加識得睇住條數」。
帶隊創科「走出去」 重心轉戰內地商場
睇返今次受邀出席嘅 founders，大部分都係由香港科技園、數碼港或者各大大學創科孵化計劃支持嘅本地年輕創業者。Adrian 喺致辭時提到，今次交流旨在主動融入國家發展大局，探討如何將香港科技人才同大灣區資源進行深度融合；而扮演「超級聯繫人」嘅佢，亦希望將呢班本土培育嘅創科新星聚埋一齊帶領佢哋「走出去」。
至於唔少人都關心佢之後嘅動向，現場八返嚟，話 Adrian呢期成日變身空中飛人頻頻飛返內地，嚟緊業務重心會放喺內地商場項目。
