三年前，我喺一次happy hour認識Jerry。佢做緊一間BB嘅ECM（注1），平日工時係長啲，但工作有挑戰性，team culture又不錯，收入更加係豐厚，所以佢好享受呢一份工作，冇諗過離開。
一年前，事情出現了變化。由於一位同事轉工，老細請咗一位新同事Coco，頂上空缺。本來，Jerry諗得好正面，好歡迎Coco。一來，有一位新同事頂上，代表人手冇少到，佢唔使做多一份，增加工作量。二來，Coco係一名靚女，作為男性嘅佢當然歡迎，同靚女做同事，一定賞心悅目啦？
點知，唔請好過請。
雖然Coco十分睇得，但佢真係一個百分百偶像派，得個靚字，做嘢唔多掂，成日要Jerry執手尾。平日啲pitchbook，叫佢更新返最近十二個月嘅數字，佢求其畀返最近六個月你就算；叫佢起草一份問卷，已經畀埋範本佢抄，佢改咗公司名就算，連行業都冇改；帶佢出去盡職調查，訪問一間銀行，佢夠膽遲到二十分鐘，成村人等佢一個。一開始，Jerry念在Coco新加入，生得靚女，楚楚可憐咁，冇好惡咁鬧佢，只會努力提醒。後來，Coco真係屢勸不改，Jerry先鬧佢，並向同事反映。唔講由自可，一講把幾火，原來其他人對Coco亦十分不滿。
「吓？原來上次佢幫你print兩頁紙咋？佢同我講，你要佢搞份合約，佢冇時間幫我執份pitchbook，我先自己一個執咋。」
「頂！成份合約都係我draft我check㗎，佢鬼有搞過咩！Print嗰兩頁紙話自己搞，佢真識玩！」
「喂，咁前日佢唔得閒寄信畀政府，係咪要幫你draft email？」
「收皮啦！嗰封email使鬼draft咩，我畀晒版佢抄㗎，佢改咗成個鐘先畀返我，點知仲係錯！」
大家七嘴八舌，還原真相，先發現Coco瘋狂利用同事，極力卸膊。Jerry終於明白，點解Coco入行五年，做ECM咁辛苦，仲可以保持年輕貌美，因為佢都唔做嘢，又點會挨殘個樣？
冇耐，大家決定向老細反映，佢地寧願炒咗Coco，挨到請到新人，好過要幫Coco執手尾，日日頂住條氣。
「經過多番投訴，老細決定炒Coco啦。」三個月前，Jerry同我講，我以為事情告一段落。
前日，我同Jerry去happy hour，一見到佢，我即刻問：「點呀？炒咗Coco未呀？」點知，Jerry畀咗一個驚嚇嘅答案我——冇炒Coco，Jerry走咗，下個月返新工。
「吓！發生咩事！點解變咗你走㗎？」我極度驚訝。
「X佢老X，嗰日老細叫Coco入房，已經要炒佢，點知Coco話：『我有咗。』佢出絕招呀！佢生仔呀！」Jerry咬牙切齒，睇得出佢勁想打Coco一鑊金！
「頂，佢真識玩。生仔真係大絕。」我好無奈：「但係，你都唔使走㗎，你由得佢生完仔，老細再炒佢咪得囉？」
「唉，阿晞，」Jerry開咗教女模式：「我看透咗㗎啦。其實我地叫咗老細炒Coco好耐，佢拖拖拉拉，搞到今日人地大肚先嚟炒，可以睇得出佢放任冗員，管理不善啦，我跟呢一種老細亦冇意思。我自問唔係廢人，而家條team有廢人，咁廢人唔走，咪我走囉。無謂留低，日日怨人。」
Jerry嘅說話又有啲道理。如果我日日怨同事廢，但佢又同我做到同事，會唔會其實我地嘅程度係差唔多？與其怨佢廢，不如轉去一個更有挑戰性嘅環境，同一啲我欣賞嘅人共事。
Well，希望我嘅同事睇完呢篇文，唔好即刻辭職⋯⋯\
（如有雷同，實屬不幸）
注1：BB即Bulge Bracket，意指提供所有服務的大型投資銀行；ECM即Equity Capital Markets，股票資本市場部（編按）
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
