中資不過洋節聖誕「普天同慶」觸禁忌?!（關公妹）

唔經唔覺，又到咗12月喇！年尾可以話係PR同Marketing最最最忙嘅節日，聖誕只係個開始，接住除夕、新年、情人節咁落！今次好榮幸接到一個中國品牌嘅聖誕project。

作為土生土長嘅香港人，喂！一講起聖誕節，有乜形容詞形容聖誕節先？諗都唔使諗，一定係普天同慶㗎喎！係咪先？

點知……

阿客：「聖誕節不可以用普天同慶！這個詞只適用於全天下或全國共同慶祝的日子！一般指春節、國慶節之類的正式節日，聖誕節算不上。」

當下有少少驚訝！聖誕節喎！係普天同慶聖誕節喎！全天下嘅人真係會一齊慶祝中國嘅春節同國慶節咩？心裏面帶住好多個問號，但我都依然帶住專業嘅精神聽取客戶嘅要求！但不得不說，呢個文化衝擊的確對我嚟講真係好新穎！

關公妹：「這個… 我改改！」

阿客：「注意一下！聖誕節是洋節，所以更加不適合這個詞！」

收到你！即改！鬼叫我關公妹不嬲都顧客至上㗎咩？然後我成句改咗，寫咗「歡度佳節」……

阿客：「小關！聖誕節也不能用佳節這個詞呀！就和普天同慶一樣，一般只能用在正式或中國的傳統節日，知道嗎？」

又再衝擊多一次！

關公妹：「明白！我再修改，不好意思！」

作為寫稿寫到夜闌人靜、飲咖啡飲到胃痛嘅食物鏈最低層，呢單聖誕Project真係令我認識咗好多新嘅「規矩」。出咗嚟做嘢咁多年，聖誕節對我嚟講，應該都係大同小異，駕輕就熟，估唔到今次真係考起我！

改了又改，改完再改，最後交咗「一同迎接聖誕，傳遞美好祝願。」

呢句冇用到「普天同慶」同「佳節」，仲小心避開咗一啲唔夠中立嘅字眼，簡直係過咗層層關卡。

阿客睇完，終於開綠燈：「嗯，不錯！這次的文案比較符合我們的定位。」

媽！我得咗喇！改足全日，終於鬆口氣！雖然改到已經冇乜「聖誕味」，但只要客戶滿意，我就滿意。

關公妹筆記

感激阿客好耐心同好直接咁提醒我，同我討論。了解唔同地方、唔同語法有唔同表達方式，當然理解品牌有自己嘅風格同堅持！最後同阿客達成共識，就係唔需要為聖誕節加上任何形容詞！同時我喺度諗，既然品牌想打入香港市場，唔係應該用香港市場嘅角度切入咩？

由於覺得呢個文化差異好有趣，於是上網了解下中國嘅新聞通常會用乜嘢形容詞形容聖誕節，結果係「西方的聖誕節」同「今年的聖誕節」！今次真係長知識了！

更多聖誕節相關報導