過去的周末碰上假期前夕，二手持續回升，連一手亦開始有全新盤啟動，似乎疫情放緩後樓市信心開始回復，搞到老樓都要跟車貼啲。某日又同老友揸車去睇樓，上次新界東，今次新界東，集中大埔一帶，首站便是由快離任特首林鄭月娥倡議興建白石角站一帶，即係科學園附近。
開車前先睇樓資料、做下功課，大埔區再現新盤供應，預計今年有逾2,130伙單位應市，當中以新地優景里項目最矚目。 新地大埔新盤位於優景里63號，其14座住宅大樓，分3個期數發展，合共提供1,871伙單位，主打中小型單位。新地指項目亦設有逾200個商舖，網羅潮流生活店及餐飲食肆，並以年輕生活為主題，為住客提供日常生活體驗。又係打年輕客主意，既然這樣，一於行這裡。
在導航帶領下，由吐露港公路轉入大埔舊路走，離遠已經見到新地大大個招牌，由於距離吐露港公路一旁，另一旁便是科學園及豪宅群，話唔定他日高層有海景，轉入優景里，首先便在體育中心運動場附近找找「未來港鐵站所在，應該正正在運動場對面便有一塊工地，而且做緊工程，有泥頭車出入，優景里兩旁為聳天高樹，環境有點像老樓溫哥華列治文區，所以停車一陣感受下天地之氣。
優景里項目步行約兩分鐘便到達，項目已建至20樓左右，地盤呈長條，其中一期及二期快見頂，三期仍在地基工程中，後方便是區內村屋群，不太密集，泊車後行了一個圈，老樓沒有聽到太大車聲，包括吐露港公路一帶，另外有一條人車天橋通往白石角住宅群，兩條路適隨尊便。
新地今年手上項目很多，包括可以隨時開售的沙田瓏珀山二期、北角海璇二期和屯門兆康第54區，若果大埔項目順利的話，或可以在下半年開售。新地副董事總經理雷霆透露，踏入本季，該集團計劃連推5個樓盤，涉及2,113個單位，「重頭戲」包括優景里1期及屯門兆康1A期項目。
老樓反而聽聞，同區由香港興業及希慎興業合作發展的首個項目，黃魚灘鄰近聚豪天下的中低密度項目，好快有消息，故再驅車前往。由優景里駛往汀角路約十五分鐘，在香港教育大學一路由露輝路上到頂，便見到一排由三層高分層大廈和別墅屋組成，現場有好多建築工人開緊工，但在路邊亦可以清晰看到整個規模，對上一個盤便是廿年前的聚豪天下，看規模應該大過聚豪天下。
資料顯示，露輝路36號將建有41座洋房/獨立屋及14幢分層住宅大樓 (另設1層地庫)，合共提供262個單位，現場觀察距離現樓不遠，據地政總署資料顯示，關鍵日期為今年10月底，換句話說，好大機會以接近現樓推售，據坊間人士表示，發展商們計劃在短期內有推廣動活，隨時爭取疫後第一盤，可能更較元朗錦上路站柏瓏I更快。
資深傳媒人 劉兆昌
更多最新最熱最有用財經金融地產資訊 請即登記成為Finance730會員
追蹤Finance730 動向 《Finance730 網頁》
▼緊貼最新市場走勢
《Finance730》Facebook
▼消閒生活 時尚品味
《Finance730》Instagram
▼投資教室 專題研究
《Finance730》YouTube
