阿晞係文科出身，大學時只愛創作，不愛工作，冇為事業作任何準備。大學四年，商科同學四出實習，又參加各項師友計劃（Mentorship Program），向導師（mentor）學習。我四出旅行，吃喝玩樂，而我不知道甚麼是mentor。
大學畢業，誤打誤撞入咗投資銀行，見到同事拎住三四份大行實習，又識好多同行，我就一張白紙，冇乜實習經驗，又唔識人，真係想收埋自己喺櫃桶。當時我只有一個問題：「點解你地一早就知要實習？這些機會，你點搵的？」原來，好多人都有mentor教路。
呢一行大部分人係商科出身，甫入大學，喺迎新營、學術活動、同學交流中，佢地得知唔同嘅Mentorship Program，報名參加，認識自己嘅mentor。
一位好嘅mentor，絕對有助你嘅事業發展。
首先，mentor可以幫你搵工。作為行內人士，mentor把握到行業資訊、人際網絡、情報。假如佢地要請人，你嘅表現又好，當然係近水樓臺先得月。即使佢地唔請人，佢地相熟嘅行家請人，都可以即時話你知，直接幫你遞交履歷，再美言幾句，成功率大增。再唔係，你自己想應徵一啲職位，都可以問下佢地有冇得轉介，有嘅當然幫助到。識人好過識字，識到一位人脈廣嘅mentor，求職可以事半功倍。
而且，mentor可以分享大學冇教嘅知識。唔好話文科出身，即使係商科出身，你識砌financial model，識背上市規則，考晒HKSI所有卷，都未必知一個Analyst嘅實際工作係咩、一個IPO要點做。要了解Analyst嘅日常工作，始終要問行內人。而mentor分享嘅資訊，係最直接、可靠嘅，對工作面試有極大幫助。
好記得一次面試，老細問我知唔知呢一份工實際係做乜，我簡單地回答，但佢冇放過我，不停地追問：「你話review，即係咩review？點樣去做一個review？搵邊一個做？要經過邊一個部門？你可唔可以舉一個例子，去詳細說明？」然後，我全部答到。佢好驚訝，話見我份履歷就知我一啲經驗都冇，佢問得咁詳細，只係想知我識得幾多，但我答到好似做過份工咁，令佢印象深刻。其實，入行三年後，我識咗兩位mentors，佢地做過同一位置，面試之前，我多次向佢地請教，先可以準備充足。
一位好嘅mentor，唔止可以幫你求職、了解行業，甚至對你嘅生涯規劃有幫助。如果有機會認識mentor，千祈唔好錯過。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
