股評人譚朗蔚（Stevan）喺Facebook分享自己最近遇到街頭騙案經歷，不過呢單騙案認真騎呢，事關佢俾人呃走嘅，竟然係一對長襪？
Stevan話，星期二晚佢搭的士上車嗰陣，突然有個男人敲車窗，問佢有冇黑色襪賣，之後仲問佢著襪係咪黑色。Stevan當下梗係驚啦，點知個男人仲拎咗張五百蚊出嚟，求佢賣對襪畀佢，又解釋自己係救護員趕住返工，冇黑襪嘅話上司唔畀開工咁話。最後Stevan心軟，除咗對黑襪畀個男人，仲同個男人換咗對灰襪返嚟𠻹。
正當Stevan一心以為自己幫咗人，點知返到屋企同老婆講先發現自己中「騙案」，原來已經好多人遇過類似事件，好似丁子高、方力申同洪永城都中過招，喺連登同高登都好多人分享過自己中招嘅經歷。
我哋上網查過，有人話呢類係東南亞轉運儀式，用人哋嘅貼身衣物作法轉移壽命健康，又有人話係搵「替死鬼」，將自己嘅災厄、病痛之類過畀襪嘅主人；都有網民覺得，其實只係變態佬，純粹貪Stevan靚仔，想拎對襪返去玩下喎。
到底係變態定落降頭，大家都唔知，不過嗰位「騙徙」都有可能係睇咗呢條片（貼馬準過貼股？譚朗蔚為「燈神」大平反），知Stevan份人有料又好運，所以想沾下啲旺氣啫。Any肥，Stevan，祝你好運喇！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
