呢一兩年經濟好差，相信大家都感受到。香港主打金融業，一眾同行固然首當其衝。生意淡薄、年度獎金大減、大規模裁員，全部一齊嚟。任職PB嘅Maggie好好彩，冇俾人炒到。但係，公司已經凍薪兩年，又派得一個月獎金，令佢去意已決。
可惜，搵工極為艱難。多次嘅搵工經驗，更令Maggie唔再相信HR，立下「No Contract No Talk」嘅宗旨。
半年前，Maggie開始搵工。可惜，經濟不景，唔好話面試機會，連招聘廣告都少得可憐。好不容易，有公司搵佢面試，佢落足心機溫書，又請全日假去準備，好多見完一兩次，都石沉大海。
屢敗屢戰，有一日，佢終於收到HR電話，得到一個口頭offer。
「Yes! 我得咗啦！」佢開心到喺廁所大叫，仲即刻打畀我，分享呢一個好消息。
兩個月後，我地一班朋友食飯，我問起Maggie：「返咗新工未？啲同事如何？」
「頂，不要再說了。佢地收返個offer，食屎啦！」估唔到Maggie會咁答我！
「吓？」大家無不詫異。
「佢畀完口頭offer我，我等咗兩星期，佢都未出到合約。咁我就打去追啦，佢話finalize緊，要啲時間。之後我每兩三日就打去一次，佢都淨係識答我finalizing finalizing。一個月後，佢話freeze咗headcount，請唔到我！」
「妖⋯⋯冇錢唔好請人啦。」大家表示不滿。
「呢個都未係最嬲，最嬲係佢地講大話，根本唔係冇headcount！」Maggie嚟個反高潮：「我有朋友喺同一間公司做，佢話根本請咗另一個人。」
「吓？咁做乜畀口頭offer你？」
「後來我同headhunter傾開，先知有啲公司好賤，同一時間畀口頭offer兩個人，事實上只係請一個。佢地會畀合約first choice，同時拖住second choice。假如first choice有咩事onboard唔到，仲有一個人可以頂上。假如first choice onboard到，就同另一個講冇headcount，拜拜你條尾！好彩我冇辭職，如果唔係，而家我失咗業啦。」
「嘩，原來有呢一種玩法。頂，你叫人以後點信HR。」救命，求職市場極黑暗。
「係呀，我已經唔會再信㗎啦。一日未拎到份約，我都唔會開心住，繼續搵工，搵到有約為止。No contract no talk!」Maggie堅決咁講。
唉，呢一種請人手法，恕我無法認同。作為一名求職人士，我明白求職十分困難。首，見一份工，我要請假。然後，見工之前，我要浪費時間、心血去溫書。而且，見工之後，又要承受患得患失嘅心理。你話攰唔攰？好啦，你話請我啦，等我以為守得雲開見月明，點知一場歡喜一場空，真係慘到喊。
我知道，勸HR唔好玩人，絕對冇用，可能係公司策略，佢地一定要跟。所以，我決定調返轉，勸下一眾同行，唔好太信任口頭offer，要學下Maggie——no contract no talk。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
