富商「大劉」劉鑾雄今（3日）早舉行記者會炮轟蕭若元在網台節目胡說八道，並再三與呂麗君（現名呂姵霖）劃清界線，表明極不願被人誤會或造謠兩人復合，並特意澄清身家並不止分配予陳凱韻（甘比）。
劉鑾雄：陳凱韻以外家人或有財產分配
大劉早前與前女友呂麗君現身銅鑼灣皇室堡，繼而惹來復合揣測，事後大劉曾對此就發出澄清聲明，指對於近日有媒體明示或暗示，意指他與呂麗君（現改名為呂姵霖）復合一事，並非屬實，而文中提到「本人於2016年與陳凱韻結婚，亦早已將絕大部份名下財產作出處理，以防日後他人作出任何無理訴訟，所作一切無非為保障陳凱韻及家人，避免日後有人為一己私利，興風作浪」。
今日的記者會上，大劉表示：「『陳凱韻與家人』嗰句我想特別澄清，因為嗰句好多人會誤會……我啲中文唔係咁叻，想簡單澄清，除咗陳凱韻嗰3個細路，即係陳凱韻有，3個細路有，仲有其他我嘅家人，當然其他我嘅家人可能包括呂麗君嘅仔女，可能亦包括寶詠琴以前啲仔女，我就係想澄清呢樣嘢。」
他續指：「費事啲人覺得我啲身家俾陳凱韻擸晒，絕對冇咁嘅事。講真，我最大個仔（劉鳴煒）今年都42歲、就嚟43歲……我處理財產又唔怕失禮講畀你聽。我同陳凱韻結婚後兩日，同啲律師討論（分身家）。律師同我講，你就算結咗婚都唔安全㗎，因為你啲財產係晒信託裡邊，將來仲有得爭拗或者打官司。我諗咗兩晚之後，我寧願犧牲小我，全部派晒出去，as a gift送咗出去。我曾經同律師講，我寧願送咗出去嗰啲係畀錯人，都唔希望益啲天下極壞、極壞、極壞、極壞、極壞嘅恐怖份子。」
「我最唔想俾人見到就係同呂麗君一齊」
記者會上大劉被追問何評價呂麗君，他先是指「最唔想俾人見到我同呂麗君一齊，（日前在皇室堡）有個師奶影我相，我冇嬲佢，佢嘅層次係咁，但佢用相機影到呂麗君我就嬲！唔想人誤會或者造謠以為我哋復合，結果隔兩日就有網上打手寫『邊個大獲全勝搬返屋企』」
至於日前聲明提到「最近因呂小姐有困難，有事相求，本人為免小朋友受到影響的關係，遂與呂小姐達成商業協議」當中的困難，大劉則稱，「我做嘢都係今日留一線，他朝好相見，我更加唔會趕盡殺絕任何人……但係，你哋娛樂版唔會留意財經金融地產，如果你哋問嗰邊好快會知，我唔方便講，其實我唔係為咗對仔同女，我都極度唔想講。」
據《港股策略王》兩年前報導，曾被大劉形容為超級富婆的呂麗君2020年一批恒大債券及佳兆業債券被追孖展而斬倉，據稱單是債券部份損失數以億元計，而財經專欄作家Lousie Wong近日進一步指，「恒大爆煲後，呂麗君手頭涉及恒大有關嘅投資，班banker斬唔斬倉，聽講都要問過大劉，此乃真正背後的男人。」
只跟蕭若元見過一面 不會採取法律行動
令大劉大動肝火舉行記者會的原因是日前蕭若元在YouTube Channel就皇室堡與途人爭執事件作出評論，分析大劉是出乎想平息甘比的妒忌心而出聲明澄清與呂麗君無來住。大劉在記者會上對揶揄對方「你識佢嘅唔該同佢講聲，畀我叫聲你做蕭公子。講少啲呀！要講講蔡英文仲好啦，不過佢唔敢講啦，講兩講可能響台灣俾人拉咗啦。唔好立亂招搖撞騙，講我啲嘢講到好似咁friend，又話我有狂燥症呀……我諗佢荷包乾硬化囉！」
他指過去只有一次在黃玉郎在場的情況下與蕭若元面過一次面，而不是對方所指私下會單對單面見，但他不會向對方採取法律行動，「樣樣都法律行動變相益佢……我好諒解蕭若元，佢搵到食使乜咁吖，如果我有一日要喺平台咁呃like呀，我就大X鑊啦！」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
