Jess喺一間港資銀行做Analyst，公司嘅規模好細，只有十多人，所以每人要身兼多職，冇明確嘅分工，亦冇系統可言。Jess唔甘心喺細行工作，所以轉去一間大行。得到大行offer，佢當然開心。不過，離職之前，佢要經過一番折磨，先可以浴火重生⋯⋯
遞信當日，老細叫佢搵Compliance同事搞offboarding，佢聽命行事。可能你會話：「吓？Compliance？」冇錯，公司太細，冇請HR，咪叫Compliance嗰位Kay姐做埋囉。
Jess恭恭敬敬去搵Kay姐，同佢闡明來意，大家就入房傾離職手續。
「成日行出去講電話，都估到你跳槽㗎啦。」Kay姐不滿話。
「係咩，哈哈⋯⋯」Jess見佢唔多高興，以笑帶過。
「Jess，有啲嘢你唔啱聽我都要講。去到新公司，你真係醒醒定定呀，喺呢道你日日玩玩下，我地就縱容你姐，出面啲人唔會忍你㗎，你好自為之啦。」
「哦，知道。」面對突如其來嘅訓話、無理嘅指控，Jess不知如何反應，只可以唯唯諾諾。
「以後人地叫你就做，唔好乜都話唔識，出面啲公司冇我地咁好㗎⋯⋯」Kay姐滔滔不絕。最後，二人入房四十分鐘，傾離職只係用咗十分鐘，Kay姐訓話佔咗三十分鐘。
「X佢XX，佢入咗嚟半年咋，佢又唔係做Corporate Finance，完全冇機會同我合作，憑咩批評我！」放工後，Jess同朋友苦訴。佢自問認真工作，從未玩玩下，無啦啦俾一位唔關事嘅老屎忽訓話，瘋狂屈佢，實在係怒火中燒。
「妖，條友好明顯妒忌你搵到好工啦。你都走啦，不如鬧返佢轉頭，或者同佢玩嘢！」
「咁我又唔敢⋯⋯唉，我想大家好嚟好去。」
「咁鵪鶉㗎你，冇鬼用！」
接住落嚟幾日，Kay姐得閒冇事做，就搵Jess入房訓話，Jess真係身心俱疲，不過佢始終忍耐，只求好嚟好去。
可能你會話Jess鵪鶉，但係，結果證明佢係忍辱負重，犧牲小我，完成大我。二十多日後，佢收到新公司電話，話背景審查完成咗，只要交多兩份文件就可以。Jess去問Kay姐拎文件，Kay姐冇托手踭，好快畀晒佢，仲show自己個郵箱畀Jess睇，話背景審查嘅問題佢答晒。
Jess望一望郵箱，同背景審查公司來來回回六、七封emails，封封都大把附件，Kay姐回應得十分完整、快速。佢不禁倒抽一口涼氣——原來老細畀咗Kay姐跟佢嘅背景審查。如果當初Jess忍唔住鬧Kay姐，背景審查未必咁順利。
「雖然佢無啦啦屈我，真係好鬼刻薄，不過佢冇喺background check道玩嘢，我真係執返身彩，之前冇鬧返佢轉頭，算係正確嘅選擇。」Jess同朋友講。
呢一篇文唔係鼓勵大家乜都忍，向惡勢力低頭。不過，我個人認為，做大事要不拘小節，如果只係少少不愉快，無謂同人計較，以免招來潛在成本，哈哈。
🤫如有雷同、實屬不幸🤫
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
