知名運動品牌Adidas喺星期四宣佈，將會出售剩餘嘅Yeezy產品，有關收益將會用作慈善用途。
事緣上年10月，Adidas話因為Ye多次公開發表具爭議性嘅仇恨言論，所以就算明知會蝕錢，都要同Ye「割蓆」，仲唔止同隻會生金蛋嘅鵝結束合作，係連啲金蛋（a.k.a. 未賣嘅貨尾）都即時下架。留意返，倉入面呢批金蛋價值高達13億美元。
當日聲大大嘅Adidas CEO Bjørn Gulden經過幾個月沉思完就改口，話「燒曬呢啲鞋都唔係辦法」，但Adidas都唔會直接捐贈剩餘嘅波鞋，因為擔心呢啲產品最終可能會以迂迴嘅方式流入市場；所以Adidas決定，會先出售呢批商品，然後再將部分收益捐畀其他組織。不過Gulden冇具體說明會捐畀邊啲機構，亦冇分享具體嘅執行計劃。
Ye同Adidas之間，到底發生過什麼事？
Adidas喺2013年開始同Ye（當時仲係Kanye West）嘅個人品牌「Yeezy」合作，Adidas仲對佢哋嘅合作關係給予極高嘅評價：「係運動品牌同非運動員之間有史以嚟最重要嘅合作夥伴關係。」
由商業角度嚟睇，Adidas同Yeezy嘅合作可以話係非常成功，Yeezy系列為Adidas帶嚟咗龐大收益。以2021年為例，Yeezy銷售額高達17億美元，佔咗Adidas當年總銷售額嘅8%。
不過Ye近年多次捲入是非之中，例如佢喺2021年同結婚6年嘅妻子Kim Kardashian離婚，之後多次喺社交平台上狙擊前妻；仲有因為發表反猶太言論而導致Twitter帳號被封鎖……由於Ye有太多負面新聞，仲涉及到猶太人等敏感議題，搞到Adidas、Balenciaga、GAP、Vogue等企業同品牌紛紛同佢解除合作關係。Ye喺被割蓆之後有喺Instagram上面講過，佢一日內損失咗20億美元。
蝕錢嘅唔係只有Ye一個人，仲有之前同佢合作愉快嘅Adidas。Adidas喺同Ye分手嘅時候計過數，淨係計解約後第一年，Adidas已經會損失2.46億美元嘅利潤。
而且除咗收入上損失之外，Adidas仲因為Ye惹上官非。有班投資者最近對Adidas提出集體訴訟，指控Adidas高層多年嚟明知Ye有咁多問題，都冇採取任何預防措施，搞到最後Adidas市值下跌，投資者蒙受損失。
官司仲未有下文，但如果Adidas重新出售Yeezy系列產品做善事，可能仲會益埋Ye。根據媒體報導，睇返Adidas同Ye之前簽訂嘅協議，Ye將會獲得相當於銷售額15%嘅佣金。唔知Ye喺睇到新聞之後，會唔會公開回應呢？
