中國外賣平台美團（3690）正式進軍香港市場！美團旗下嘅新外賣平台「KeeTa」今日開始投入服務，以旺角、大角嘴為首批地區試點，預料喺今年年底之前可以將服務拓展至全港所有地區。
KeeTa一人餐連運費$60搞掂
自從Uber Eats喺2021年年底撤出香港市場之後，香港嘅外賣市場就徹底變成Foodpanda同Deliveroo嘅天下。為咗喺呢兩大巨頭手上分一杯羹，KeeTa不惜落重本推出「十億激賞」計劃吸引新客註冊，包括提供免運費券、餐飲優惠同邀請好友獎賞，仲有每個註冊新用戶都可以拎到價值$300嘅優惠券，聽落都幾有吸引力。
KeeTa指，如果新用戶用新客優惠券買麥當勞巨無霸漢堡包套餐，連運費埋單甚至唔使$50。睇返Foodpanda同Deliveroo，買一個巨無霸一人餐（除薯條外可再選擇多一款配菜）要$63，畀錢嘅時候仲要另加運費、小型訂單費用、服務費或者平台費等額外收費，埋單可能要成$80先得。
KeeTa唔止用一連串優惠吸引新客，仲針對香港外賣市場運費同最低消費門檻偏高嘅問題，推出「到手價低至$60」嘅「一人飯堂」，旨在滿足用戶嘅一人用餐需求。目前一人飯堂專區已經有KFC、南記、茶星人等熱門餐廳進駐，如果大家之後想自己一個人嗌外賣，又可以有多個選擇喇。
KeeTa 獨家準時保 為超時外賣埋單
KeeTa另一個吸客「殺手鐧」就係目前全行獨有嘅「準時保」政策。當用戶訂單實際送抵時間超出預計最遲時間15分鐘後，KeeTa會針對符合條件嘅訂單補償不同金額、冇任何使用門檻嘅優惠券，補償優惠券會喺大約24小時內自動送出。
除咗超時補償政策之外，KeeTa仲有為送遞員提供準時獎賞，鼓勵送遞員準時送餐，盡可能保障食客可以準時開飯。
KeeTa來勢洶洶，目前睇落有創意又有誠意，唔知用開Foodpanda同Deliveroo嘅食客又會唔會考慮轉會呢？兩大平台又會唔會出新優惠反擊呢？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
