外媒報道，超過350名人工智能領域嘅專家、學者、行業高層簽署咗一封公開信，警告AI可能會毀滅人類，強調減低同AI相關嘅風險應該係全世界要優先處理嘅問題。
ChatGPT之父都有份簽
呢封聯署警告信發表喺非營利組織人工智能安全中心（CAIS）嘅網站上，簽署者包括被稱為「人工智能教父」嘅科學家Geoffrey Hinton、DeepMind行政總裁Demis Hassabis，以及Microsoft首席科技總監Eric Horvitz同首席技術總監Kevin Scott等科技領域嘅代表人物。最重要嘅係，連OpenAI（ChatGPT開發商）行政總裁Sam Altman都參與咗聯署。
AI聊天機械人ChatGPT喺上年11月面世，短短兩個月內已經吸引到過億用戶。目前ChatGPT喺回應用戶提問時，可以生成同人類極度相似嘅答案。雖然提供嘅資訊未必係100%準確，但研究人員同用家已經對ChatGPT嘅能力感到驚訝。不過與此同時，有唔少人擔心如果AI有能力模仿人類工作，咁係唔係有機會威脅人類嘅存在。
今次呢份聯署聲明冇詳細描述AI會對人類構成點樣嘅潛在威脅，但就提醒人類有必要減低AI帶嚟嘅滅絕風險，而且呢項任務同應對流行病、核戰爭等其他社會規模嘅風險一樣緊要，應該要成為全球優先處理嘅重要事項。
唔係第一次有人公開表示擔心 連研發者都話驚
喺兩個月前，Tesla創辦人Elon Musk就已經聯同Apple聯合創始人Steve Wozniak、圖靈獎得主Yoshua Bengio等科技界權威人士發表公開信，呼籲暫停大型AI實驗，理由係呢種系統可能以經濟同政治衝擊嘅形式對社會同人類構成潛在風險。聯署信入面提到：「只有當我們確信其效應將是積極的，而且風險可被控制的時候，才應該開發強大的人工智能系統。」
除咗AI系統本身嘅風險之外，AI技術亦有機會會被有心人惡意使用。OpenAI行政總裁Sam Altman喺今年3月接受美國ABC新聞網訪問時有提到AI發展嘅潛在危險，例如獨裁政府可能會濫用AI技術，同埋AI模型可能會被用於大規模散佈虛假資訊。
針對以上嘅風險，七大工業國集團（G7）喺5月中公開呼籲，為咗發展值得信賴嘅人工智能，應該要建立一套關於人工智能發展嘅國際技術準則。除咗G7國家之外，歐洲議會都喺5月11日通過一份立場文件，呼籲限制歐洲嘅AI使用方式，向正式通過AI監管法案邁出咗第一步。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
