搭飛機係旅行途中其中一個重要環節，如果坐得舒服、瞓得舒適，成個旅程都可以加唔少分！AirlineRatings網站公佈咗2023年全球最佳航空公司，航空公司必須達到七星級安全評級，而且要喺乘客舒適度方面領先創新，先可以躋身前25名。今年嘅第一名就由新西蘭航空（Air New Zealand）奪得，上年嘅榜首卡塔爾航空（Qatar Airways）今年排名下跌一位，屈居第二。
不過就算既安全又舒服，都保證唔到你喺搭飛機嘅時候會唔會感覺被歧視……點解？因為早前捲入空姐歧視風波嘅「因管理不善而在全球最佳航空公司排名中節節下跌的」國泰航空（Cathay Pacific，293）都成功入選，排名比起上年仲升咗兩位，排喺第9，冇再節節下跌！
國泰終於重返前十 但連星航嘅車尾燈都見唔到？
國泰今年上返頭十位內，成績都算唔錯，不過暫時仲未重回2020年排名第五嘅巔峰。同為亞洲地區嘅主流航空公司，總部設於新加坡嘅新加坡航空（星航，Singapore Airlines）一直都係國泰嘅主要競爭對手。相比之下，星航嘅表現似乎遠遠領先國泰。星航曾經喺2019年當選年度最佳航空公司，雖然呢兩年嘅排名跌到第五位，但仲係一直贏緊國泰。
今年星航嘅頭等艙仲被評為「最佳頭等艙」。星航喺A380上推出咗全新嘅Skyroom套房，每間套房面積大概係3.23至4平方米，套房入面有一張獨立、可折疊嘅平板床，配備埋床褥、枕頭同被，床頭仲有個氣彈簧，方便乘客瞓低睇電影。星航連空中套房都出埋，如果國泰諗唔到更創新嘅idea，睇怕都好難同星航搶客啦。
星航豪派8個月人工畀員工 vs. 國泰員工炮轟公司刻薄
星航喺上一個財政年度賺咗21.6億新加坡幣（折合約125.8億港元），創下公司成立以嚟嘅最高盈利紀錄。最難得嘅係，星航賺咗錢之後都冇忘記員工嘅付出。為咗答謝員工陪伴公司度過疫情難關，星航喺今年5月宣佈向合資格員工發放相當於8個月人工嘅獎金，真係患難共苦後同甘！
另一方面，國泰喺疫情期間又裁員、又減薪，國泰空中服務員工會更多次直轟國泰剝削員工，勞資關係差到極點。今年5月嘅時候，國泰向員工發電郵，話部份國泰航班嘅滑行速度明顯慢過其他航空公司嘅航班。有前線機師就否認「呃鐘」，話減速最多都係延長飛行時間5分鐘左右，對出糧金額冇好大影響，佢哋減速只係唔想做好啲……睇得出佢哋對公司真係非常不滿。一間有士氣嘅航空公司，Crew對乘客都會好啲，至於一間士氣低落嘅公司，就大家有眼見啦~
新西蘭航空：經濟艙乘客都有得躺平
新西蘭航空今年獲選為年度最佳航空公司，佢嘅經濟艙仲被評為「最佳經濟艙」。AirlineRatings嘅編輯表示，比起其他航空公司，新西蘭航空喺長途航線上提供更多舒適選擇，其中一個被點名提到嘅例子，就係新西蘭航空史無前例地喺新型787經濟艙入面增設「睡眠膠囊」，為經濟艙乘客帶嚟頭等體驗。
卡塔爾航空曾經喺2021年同2022年連續兩次當選「年度最佳航空公司」，雖然今年輸俾新西蘭航空，不過都獲頒「最佳商務艙」及「最佳餐飲獎」。阿提哈德航空（Etihad Airways）同大韓航空（Korean Air）排名不變，繼續排喺第三位同第四位，服務keep住咁高質！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
