【膠易講場專欄】不瘋魔不成富豪，有錢人們或多或少有執念屬旁人難以理解。
位列新加坡富豪榜第2位嘅信和置業（083）黃氏家族父子，畢生信念應該係慳。老竇黃志祥搭地鐵過海慳隧道費，阿囝黃永光鍚住荷包玩車都玩二手車。呢份理應出現於貧窮戶身上、堅持一分一毫都要用得其所嘅堅持，莫名地植根響呢個富甲一方嘅Family。
只不過，黃志祥有另一份堅持就可能造福人間，尤其大家行行吓街有三急時。
黃志祥 
黃永光
家陣信和管緊大約30個噏得出名嘅商場，聽聞黃志祥有舖巡視旗下商場廁所嘅癮，見親邊個廁所污糟邋遢，第二日負責果個商場嘅負責人就會收到來自天庭嘅震怒Email。
需知道黃生幼承庭訓，經營商場八字口訣係「唔要高檔、最緊要旺」，所以唔少信置商場都位於車水馬龍之地。香港各發展商風格唔同，信置商場望落通常就噏耷（up dup）過果啲咩藝術商場，但打理商場嘅人都知最高話事人對廁所份外著緊，所以監察如廁地方都特別上心，連帶顧客都得相對企理嘅如廁環境。
黃生唔係地產界唯一一個「廁所達人」，幾年前有個陀地發展商太子爺，為咗提醒團隊排泄場所整潔性嘅重要性，親身帶埋啲公司高層去中環商場考察人地個洗手間，鞭打下屬提升水準到國際級。
將廁所衛生水提升到超級重要嘅發展商重自命定位高檔商場運營商嘅恒隆。當年仲係陳南祿做董事總經理果陣，就成日同人講要將大陛商場廁所衛生提升到食飯都冇問題嘅地步，仲有啲內地員工真係響商場搞過「廁所飯局」添。
【更多膠易廣場專欄文章】
樓市交投淡靜謀突圍 地產文學創意滿瀉
上市公司董事開會按次收費 最高可逾2萬元
股評人譚朗蔚遇街頭騙案 痛失長襪一對 竟與東南亞有關？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
