Tesla行政總裁馬斯克（Elon Musk）上個月焫著咗Meta創辦人朱克伯格（Mark Zuckerberg），兩人先而口角，繼而決定動武，後來甚至有傳佢哋要喺羅馬鬥獸場隻揪，雖然意大利文化部否認咗有關傳聞，但無論喺邊度開戰都好，呢場決鬥應該都唔會被取消㗎喇。不過喺決鬥開始前，馬斯克先贏一仗，成為2023年上半年全球身家增加最多嘅富豪；朱克伯格緊隨其後，排名第二。
雖然聯儲局持續加息，俄烏兩國又未停戰，地方銀行面臨爆煲危機，但股市喺過去六個月普遍上漲，一班富豪嘅身家自然升埋一份。彭博報導，全球五百大富豪嘅財富喺今年上半年增加咗8520億美元；如果齋計彭博億萬富翁指數嘅上榜富豪，佢哋喺過去半年，平均每人每日賺到1400萬美元。全球首富馬斯克今年嘅淨資產增加咗966億美元，係今年上半年身家增長最多嘅億萬富豪，排名第二嘅正正係馬斯克嘅準擂台對手朱克伯格，身家多咗589億美元，亞馬遜（Amazon）創辦人貝索斯（Jeff Bezos）就排名第三。唔知呢個排名會唔會刺激到朱克伯格更加努力練武，爭取喺擂台上反勝馬斯克呢？
興登堡研究成億萬富豪狙擊手 前亞洲首富身家少咗602億美元
前亞洲首富、印度富豪阿達尼係身家縮水最多嘅億萬富豪。今年年初，美國沽空機構興登堡研究（Hindenburg Research）喺阿達尼集團增發股票前夕，發表報告指控阿達尼集團涉嫌欺詐及市場操控，令阿達尼集團市值蒸發1000億美元，阿達尼嘅身家亦隨之暴跌，連亞洲首富寶座都保唔住。
「華爾街狼王」伊坎（Carl Icahn）一樣慘遭興登堡研究毒手，佢嘅淨資產喺上半年少咗134億美元，身家跌幅高達57%，傷得仲重過阿達尼，係上榜億萬富豪中身家縮水幅度最大嘅「受害者」，主要原因係佢旗下嘅上市公司Icahn Enterprises喺今年五月被興登堡研究質疑涉及龐氏騙局，導致Icahn Enterprises股價急跌。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
