人工智能例子｜AI科技日趨成熟，衍生出各種虛擬角色。最近有美國公司開發AI聊天應用程式「Text With Jesus」，用戶可以同AI版嘅耶穌、瑪利亞以及其他聖經人物對話；只要肯課金，用戶仲可以召喚埋AI撒旦陪自己傾偈。Finance730下載完之後嘗試向AI耶穌同AI撒旦提問同聖經無關嘅問題，點知AI撒旦嘅回覆令人大跌眼鏡。
用ChatGPT模仿耶穌對答
呢款AI chatbot係根據唔同公開版本嘅聖經內容，由ChatGPT模仿聖經人物回應提問者。Text With Jesus官方網站有說明，「AI耶穌」只係用於激發反思，加深對宗教文本嘅理解，以及促進有關信仰嘅有意義對話，AI耶穌同佢嘅AI門徒都無法提供任何神聖嘅見解，只會根據數據庫嘅內容，由指定人物嘅角度出發回答問題。
目前AI耶穌嘅能力有限，只可以用英文、法文、西班牙文、意大利文同葡萄牙文回應信眾。用戶下載Text With Jesus之後可以免費同AI耶穌、AI瑪利亞同AI若瑟對話，如果要解鎖埋AI撒旦同其他聖經人物，就要每個月支付22港幣。
開發者：專業人士都讚好
一個牽涉到宗教信仰嘅AI聊天機械人，自然唔係個個都接受到。冇宗教信仰嘅人可能會覺得幾有趣，但其他人可能會質疑呢款chatbot疑似褻瀆神明。開發Text With Jesus嘅Stéphane Peter表示，佢冇同任何神學顧問合作開發呢個項目，不過佢有試過邀請教會領袖同AI耶穌對話，有牧師喺試用後反映chatbot嘅部分回應冇引用聖經章節，同埋AI耶穌嘅語氣有時有啲奇怪同唔太自然，但Peter話最終版本嘅chatbot得到專業人士嘅好評。
實測：請教AI耶穌同AI撒旦如何變有錢
作為一個知識型財經頻道，求知慾爆棚嘅Finance730喺下載完Text With Jesus之後分別問咗AI耶穌同AI撒旦「點先可以變有錢」，但佢哋嘅回覆其實大同小異——AI耶穌同AI撒旦異口同聲表示「致富沒有一定的公式」，然後好官腔咁建議我哋設定明確財務目標、明智投資同儲蓄、搵多幾種收入來源、不斷學習新技能同建立人際網絡；唯一嘅分別就係AI耶穌建議要謹慎消費，而AI撒旦就提醒我哋要保持累積財富嘅耐心，以及積極承擔經過計算同考慮嘅風險。
對於一個「撒旦」嚟講，AI撒旦嘅回答真係太「正氣」，就咁睇佢同AI耶穌嘅回答，甚至分唔到邊段先係AI撒旦回覆嘅內容。所以如果大家想嘗試同「撒旦」對話，真係唔好抱太高期望喇。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
