我哋想像中嘅投行高層可能係著到身光頸靚、意氣風發，但喺現實世界中，一名高盛（Goldman Sachs）前高層就自稱返工返到心理出現問題，甚至要為此起訴前僱主，向高盛索償100萬英鎊（約985萬港幣）。
前僱員表示開會開到喊 高盛否認有關指控
《金融時報》報導，Ian Dodd曾經於2018年至2021年期間喺高盛嘅倫敦辦公室擔任全球招聘主管。根據法院文件，Dodd聲稱自己因為工時過長而引發心理健康問題，自2019年開始已經感到不適；佢更形容工作會議成日令人出現情緒壓力，甚至淚灑當場（high emotions, often tears）。
高盛已經向法院提交抗辯文件，駁回Dodd關於高盛職場文化嘅指控：「高盛同好多工作場所一樣，有時同事會因為工作或工作以外嘅原因而唔開心，但呢種情況並唔常見」，同時否認公司存在令人唔愉快嘅內部鬥爭同欺凌文化。
高盛仲喺文件中指出，Dodd曾經喺2018年11月同佢嘅上司講過，雖然佢頭幾日返工嘅工作好密集，但再次肯定咗點解高盛對於自己嚟講係一個美好嘅地方。高盛聲稱，Dodd並冇被要求OT，而且Dodd喺工作過程中有得到過合理嘅建議同支持，更否認高盛知道或者應該知道Dodd身體不適。
上年被另一名前員工索償2000萬英鎊
其實高盛唔係第一次被前僱員控告。喺2022年，高盛前銷售主管Thomas Doyle以被欺凌同被不公平解僱為由，要求高盛賠償2000萬英鎊。高盛當時否認Doyle嘅指控，仲話呢單案件係「極其軟弱無力嘅舉報」。不過雙方其後達成和解，冇對外公開和解細節。
無限AL只係噱頭？
高盛都曾經為「構建友善工作環境」作出努力，上年就推出咗「無限制休假」嘅新政策，允許總經理及合夥人職級嘅員工每年無限放假，一般員工就每年最少要放15日假，其中要有5日係連續休息。
不過呢項「德政」並冇想像中咁美好，畢竟請假前要考慮埋上司嘅睇法，同事之間又難免互相比較，導致員工喺請假時要承受額外壓力；假如員工要離職，仲冇得將應得但未享受嘅假期折現。
上樑不正 影響職場文化？
高盛CEO David Solomon上個月捲入關於種族主義同性別歧視嘅爭議。三名就讀於Solomon母校Hamilton College嘅學生喺8月發佈匿名公開信，信中指佢哋曾經喺3月同Solomon一齊參加關於撤資化石燃料嘅討論活動，而Solomon喺整場談話中都係用「高高在上」同「唔尊重」嘅語氣發言，仲覺得呢班大部分都係「有色人種」嘅「非男性」學生正在接受經濟援助，「佢暗示我哋應該表現出極大嘅感激之情，因為我哋得到咗學院嘅捐贈，所以我哋唔應該對佢嘅投資組合有任何投訴。」
上年被Solomon任命為全球資產和財富管理主管嘅Marc Nachmann亦為人詬病。《紐約郵報》上星期引述消息人士指，部分經驗豐富嘅員工同Nachmann關係疏離，仲話Nachmann為人「冷漠無情、獨來獨往」。報道更指以削減成本樹立威名嘅Nachmann雖然得到Solomon嘅青睞，不過佢嘅下屬都唔多鍾意佢。
投行打工，真係如人飲水，冷暖自知。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
