Mozilla喺星期三（6日）發佈最新消費者私隱測試結果，調查發現汽車製造商可以收集大量關於車主嘅個人資料，並將呢啲資料提供畀廣告商同政府部門。最離譜嘅係有部分汽車生產商甚至喺私隱政策中提到，公司會收集包括性活動、性取向在內嘅個人敏感信息。
私隱政策連性玩具都不如
Mozilla曾經研究過智能喇叭、連接網絡嘅家用電器、健身追蹤器等產品嘅私隱風險，而汽車係當中私隱評分最低嘅產品，連喺私隱方面惡名昭著嘅心理健康app喺收集同使用個人數據上都做得好過車廠，Mozilla仲話約會app同性玩具提供嘅安全信息都比汽車詳細。
個人資料任由第三方存取？
Mozilla今次嘅調查涵蓋BMW、Honda、Toyota、Kia、Tesla等25個知名汽車品牌，但所有車廠喺私隱方面都無法達到Mozilla嘅最低標準，Mozilla亦無法判斷車主嘅個人信息有冇被加密。
單係細閱各大品牌嘅私隱聲明，Mozilla已經發現到好多問題。有19間汽車製造商喺私隱政策中寫明，公司可以出售客戶嘅個人資料；仲有一半品牌係會喺政府同執法部門嘅「要求」下分享客戶信息，過程中甚至唔需要法院命令。喺25間車廠中，只有Renault同Dacia允許車主刪除佢哋嘅資料。
無法得知車廠用咩方式收集數據
Mozilla表示，喺車主將智能電話連接到汽車之後，汽車公司就可以通過各種方式收集車主嘅個人資料，「由感應器、麥克風、鏡頭、電話、手機app，以及你喺車內連接嘅裝置結成嘅網，可以大量獲取車主嘅資料。」
Mozilla嘅發言人Kevin Zawacki補充，顧客現時幾乎無法清楚得知汽車製造商係通過咩渠道掌握所有數據。
車廠私隱政策：可以收集性活動等信息
Mozilla仲點名指出Nissan嘅私隱政策可能係佢哋見過最驚人、毛骨悚然同混亂（“the most mind boggling, creepy, scary, sad, and messed up”）嘅私隱政策。「Nissan直接表明，佢哋可以收集同分享包括性活動、健康數據在內嘅敏感個人資料，呢啲信息會被用於進行針對性嘅營銷。」 《紐約郵報》報導指，Mozilla曾向Nissan查詢車廠係如何收集數據，但未有得到回覆。
韓國汽車製造商Kia嘅網站上都有類似嘅說明，表示車廠會收集種族、宗教信仰、健康、性生活、性取向等敏感個人資料。不過Kia發言人其後澄清，Kia唔會、亦從未喺提供連接服務嘅過程中收集性生活同性取向相關嘅資料。
風險咁大 仲夠唔夠膽喺車上壞壞？
加州上個月批准咗自動駕駛的士喺舊金山投入服務，結果好快就有人公開分享喺的士上發生關係嘅經驗——一嚟唔需要擔心被司機發現，二嚟架車行駛緊，就算有其他司機或者路人經過，都無法清楚睇到車入面發生咩事，感覺私隱都得到保障。不過結合Mozilla嘅報告內容，喺車上親熱無疑係將性生活資料分享畀車廠。唔知呢個調查結果會唔會遏止到喺自動駕駛汽車上做愛做的事嘅歪風呢？
車廠資料外洩意外常有發生
今年5月，Toyota發現有一部伺服器因為配置出錯，導致喺10年間洩露咗超過200萬名客戶嘅資料，其後又喺6月發現有另外兩部已經出錯7年嘅伺服器存在同樣問題，其中一部伺服器外洩嘅資料更包括客戶姓名、住址、電話號碼、電郵地址等重要信息。
冇出現喺Mozilla調查中嘅蔚來之前亦爆出過重大資料外洩事件。蔚來喺上年12月表示，部分客戶信息同銷售資料喺2021年8月被竊取，盜取資料嘅黑客仲向蔚來勒索225萬美元等值嘅比特幣。到咗今年9月5日，蔚來法務部喺微博發文，其中提到「公安機關於近日成功偵破一起惡意攻擊蔚來信息系統的案件，目前已抓獲相關犯罪嫌疑人，該刑事案件正在進一步偵辦中」，不過就冇表明係唔係講緊黑客勒索事件。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
