雖然美國法律冇強制顧客畀小費，但唔畀小費或者畀得太少都可能會被視為冇禮貌嘅行為。不過近年多咗餐廳同商店用電子裝置取代傳統嘅小費罐，搞到店員同顧客都好老尷，唔少美國人仲被迫留低過高嘅內疚小費（guilt tipping）。
眾目睽睽下支付貼士 群眾壓力倍增
Forbes Advisor最新嘅報告顯示，喺商店以電子支付取代傳統小費罐之後，有近65%嘅受訪美國人會額外畀多11%或以上嘅貼士。報告指其中一個原因可能係因為顧客以前畀幾多小費，某程度上取決於銀包入面有幾多錢，但改用電子支付之後，顧客想畀多啲貼士時唔會再受到限制；另一個原因就係比起依家喺屏幕上選擇支付金額，顧客以前喺打開銀包、拎錢出嚟嘅過程中更能感受到「支付貼士」嘅影響同分量。
報告亦指出有31%嘅美國人會因為畀小費而感到有壓力，仲有26%及23%受訪者會感到不知所措同尷尬。試想像喺顧客畀錢嘅時候，店員同其他排緊隊嘅人一齊用熾熱嘅眼神望住佢，顧客可能會受群眾壓力影響，被迫支付更高金額嘅小費——呢種類似於情緒勒索嘅現象被稱為「guilt tipping」。
只要係服務業 都應該收小費？
58%嘅受訪者表示，佢哋最有可能會為堂食餐廳嘅服務支付小費，但其他行業或者店舖就未必值得顧客額外畀貼士，其中分別有40%同34%嘅受訪者認為快餐車同咖啡店唔應該收取小費。
Starbucks新小費制度成社恐地獄
Starbucks係其中一個集「唔應該收貼士」同「guilt tipping」兩大標籤於一身嘅例子。Starbucks上年推出咗新嘅小費制度，使用信用卡付款嘅顧客需要喺店員嘅注視下選擇畀幾多貼士，有聲稱喺Starbucks工作嘅網民話呢個支付過程會令店員覺得非常尷尬，因為佢哋需要開聲提醒顧客喺電子屏幕上選擇小費金額。
唔止店員覺得唔自在，連顧客都感到好無助。根據屏幕上顯示嘅建議金額，佢哋可以選擇支付1美元、2美元或者5美元嘅小費，但如果唔想畀足1美元，又或者唔想畀小費可以點做？顧客可以手動輸入小費金額，或者點擊「No, Thank you」，不過成個過程都會被店員凝視住，令顧客喺拒絕支付小費時需要面對更大嘅「壓力」。
電子支付真係好過傳統小費罐？
商店同餐廳嘅「建議小費金額」唔一定係「合理小費金額」，《紐約郵報》曾經訪問一名住喺紐約布魯克林嘅消費者：「我買咖啡同糕點用咗23美元，但建議小費金額居然係8美元。」
顧客畀完小費之後，員工點樣分配貼士都係未知之數。電子支付處理系統Square允許僱主以多種方式向員工分配電子小費，例如可以直接發放畀處理交易嘅員工，亦可以按每筆交易或者工作時數平分畀佢哋。
不過《紐約郵報》曾經喺上年向四間Five Guys分店查詢佢哋係點樣分配員工嘅小費，其中兩名經理表示「唔清楚」，另外兩名經理就拒絕回應。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
