產檢一次要$1,000，奶粉一罐要$250，私家醫院生仔又要五位數支出，playgroup一堂$600……兩萬蚊獎金，隨時未出世就使晒，今時今日養大一個小朋友嘅開支又止唔止600萬呢？如果將養小朋友需要用到嘅錢儲起，會唔會夠自己退休養老呢？最近有網民喺小紅書上發文體驗「電子懷孕」，即係代入準媽媽角色記錄育兒所需開支，再存起相應金額嘅收入，以懷孕為主題發展儲蓄劇情，結果意外吸引到唔少網民跟風「懷孕」儲錢。
00後小丁喺小紅書上建立咗一個名為「假裝養娃存錢」嘅帳戶，兩個月前發佈咗第一則貼文「假裝養娃第一步：今天你發現自己噁心想吐」，正式展開「電子懷孕」嘅養胎生活。當日嘅劇情要求「孕婦」用30元買一支驗孕棒以確認是否懷孕，於是小丁就將30元存入自己嘅「育兒戶口」。根據劇情需要，小丁每日需要儲嘅金額都唔一樣，有時只係要用25元買營養補充品，但有時會需要用200元做產前檢查。
小丁「懷孕」未滿一個月就已經喺小紅書上爆紅，至今累積咗3.6萬名followers。有半路加入一齊懷孕嘅網友仲會喺一日之內完成進補、檢查、買尿片等多個步驟，一次過儲起之前嘅開銷，趕上懷孕進度。
不過養小朋友嘅難度可能超出咗網民嘅想像，有人喺懷孕6個月嘅時候發現自己真係撐唔落去，唯有忍痛「流產」以節省開支，但為咗有始有終，佢喺支付完流產嘅費用之後仲會乖乖地畀錢坐月。
小丁嘅爆紅令小紅書上多咗好多不同類型嘅儲蓄劇情，有進取嘅網民會因為去私家醫院養胎所以用多咗錢，亦有網民行草根路線、以慳家方式育兒，想尋求儲蓄動力嘅用戶可以按能力選擇適合嘅劇本。如果唔想養小朋友嘅，仲可以選擇養老、養寵物，甚至係養高中生男友…….有網友表示自己同時關注緊修仙、世界末日逃亡、同男高中生拍拖及育兒嘅儲蓄劇情，佢認為呢種方式既有趣又可以鼓勵自己儲錢。唔知有冇香港居民會喺小紅書上開返個香港版嘅生仔劇情呢？畢竟依家生小朋友可以拎到兩萬蚊資助，喺儲錢嘅同時仲可以研究下呢筆資助對準父母嚟講有幾大幫助！亦希望唔會有劇情係個仔出世時將兩萬蚊買晒17,000點恒指牛證等財自…（灰）
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
