香港零售業面臨著困境，一田百貨縮減規模引起了市民的關注。前財政司司長曾俊華在他的Facebook上發文，提到這一事件時表示，香港的零售業面臨著困難，但他認為這也是一個轉身的契機。曾俊華呼籲香港突出品味和獨特生活方式，而香港零售業面臨的危機正好是一個轉身的契機，需要思考如何突出香港的品味和獨特生活方式，「之不過喺依家呢個經濟轉折關口，我諗都唔係最適當時候去加稅」。
最近睇到新聞，話喺沙田新城市廣場嘅一田百貨，會縮減規模，唔少朋友都好感慨，覺得又有一啲好熟悉，經常去嘅商店，逐漸消失，變哂樣。
我本身唔係一個鍾意行街買嘢嘅人，以前喺美國住嗰陣，太太話周末去 shopping，我都會嫌悶，情願留喺屋企做其他家務，吸塵，洗廁所，剪草，洗車咁。不過我就記得，喺八十年代初，回流返香港之後，我喺政府嘅第一個工作崗位，就係做沙田嘅助理政務專員，撞正日資百貨公司八佰伴，喺新城市廣場開店。嘩，當年呢件真係沙田區嘅盛事嚟，為咗慶祝佢哋開幕，我哋同沙田區議會，仲合力完成喺城門河，放煙花嘅創舉，我諗呢件事，唔少｢沙田友｣仍然津津樂道。
我唔係購物狂，但以前仔女細個嗰陣，我同太太都鍾意帶佢哋去行商場，好似去大丸呀，松板屋呀，三越咁，一嚟可以比啲細路放吓電，二嚟可以等佢哋去探索吓唔同嘅嘢，係一件好事嚟。
我自己行百貨公司，最鍾意嘅，唔係乜嘢男女裝，或者家居用品部，令我流連忘返嘅，反而係佢哋嘅 food court，因為可以搵到好多唔同種類嘅嘢食。我最懷念嘅百貨公司 food court，就係倫敦 Harrods 嘅嗰一個，每次去都會發現有唔同嘅嘢食，不論喺烤肉、芝士、朱古力同其他食品，喺嗰度一邊行，一邊就可以滿足晒睇、聞、食嘅幾種感觀，行完一轉，連晚飯都慳番，真係無得頂。
依家走上街，你都會感受到，香港嘅零售業好大鑊，前景相當困難，但我哋要接受港人北上消費、去物價低嘅地方購物，係自然不過嘅事，正如水總係向低流，所以好似我上個禮拜所講，香港一定唔可以再同人鬥平、鬥齊、鬥多，一定要做番啲有質素嘅嘢，突出到香港品味、香港獨特 lifestyle 嘅嘢。
環顧世界各地嘅大城市，好似東京、倫敦、紐約、巴黎、米蘭甚至乎係摩洛哥，其實咁多年嚟，佢哋本身嘅文化、氛圍就冇乜改變過。好似大受歡迎嘅劇集 《Crown》，我相信就係裡面提及嘅帝王主義內容吸引大家；喺東京，天王嘅神秘感亦係好特別嘅元素；米蘭獨有嘅藝術、時尚，呢啲統統都係，佢哋自身嘅獨特之處，香港點解反而會忘記，自己本來最美嘅一面呢？香港零售業面對嘅危機，正好係一個畀大家轉身嘅契機。
我仍然相信香港人嘅智慧，之不過喺依家呢個經濟轉折關口，我諗都唔係最適當時候去加稅，反而要喺支出方面｢放血｣，做呢樣嘢短期嚟講係會傷身，但如果係正確嘅嘢，就要畀啲勇氣去堅持。
＃我都做過沙田友
＃仍然相信Photos from John Tsang 曾俊華’s post
更多曾俊華相關報導
虛擬保險｜Bowtie總保障額突破600億 目標保持每月5%增長
林鄭宣布不連任曾俊華fb不斷update贈慶？ 同日推NFT助StartUp
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
