前財政司司長曾俊華周末在社交媒體發文，談及美國聯邦儲備局近期減息的影響，認為這次減息幅度相當大，當中可能帶有政治考量，預期未來聯儲局的減息幅度將會放緩，而香港銀行今次只將最優惠利率下調0.25厘，對一般供樓人士的負擔減輕幅度輕微，亦未足以成為刺激樓市的重大動力，不過減息始終是對經濟的利好消息。
最後，曾俊華表示目前經濟前景仍然充滿不確定性，呼籲大家做好準備以應對可能出現的經濟波動。
曾俊華談美聯儲減息：香港樓市影響輕微 經濟前景待觀察
原文
呢幾年香港好多嘢都改變咗、有人話完善咗，亦都有啲人質疑，香港仲算唔算係一個國際城市呢？你問我嘅話，我覺得香港仍然係好國際化，但係呢個得來不易嘅地位，係需要我哋好好去珍惜，維護同培育。上個星期，我就應一位朋友嘅邀請，出席咗一個喺舊中國銀行大廈舉行嘅飯局。呢個飯局嘅主要嘉賓，就係英國工黨嘅其中一位要員 Lord Peter Mandelson。
Lord Mandelson 喺擔任工黨嘅 Director of Communications 期間，有個綽號叫做 Prince of Darkness，所謂「黑暗王子」，佢在位期間，工黨重新定位為 New Labour Party 新工黨，提出新工黨放低舊工黨嘅左傾包袱，改走一條相對中間嘅路線 ，就係當時工黨黨魁貝理雅 Tony Blair， 大力倡導嘅 ｢第三條道路｣(The Third Way)，最終呢個改變，令工黨喺 1997 年嘅大選中大勝，結束咗保守黨長達 18 年嘅執政時期，而貝理雅就繼任英國首相之位。
打完呢仗美麗勝仗之後，Lord Mandelson 就去咗做歐盟委員會貿易專員。喺 2005 年，世貿第六次部長級會議喺香港召開，而香港作為呢次世貿會議嘅東道主，我就以工商及科技局局長身分擔任呢次部長級會議嘅主席，所以當年 Lord Mandelson 正正係我嘅歐洲對口單位。
喺當年部長級會議裡面，我哋極力爭取其他國家支持我哋嘅宣言，結果我哋係爭取到一啲成果，但係對歐盟嚟講，佢哋就唔係咁高興喇。正因為咁，當日 Lord Mandelson 見到我嘅時候，發言都不忘「翻舊帳」，話我當年「整蠱」佢，喺世貿成功爭取成個歐洲削減牛奶產品嘅關稅，結果令到佢哋嘅農業大臣想喊咁滯。
佢今次嚟香港，其中一個目的，係為佢自己競選牛津大學校監一職拉票，前港督彭定康都出任過呢個職位。係呀，佢哋選大學校監都好大競爭，一啲都唔容易，好似今次參與校監選舉嘅都有成廿人，全球校友都可以票選新校監。Lord Mandelson 希望可以成功爭取校友支持，進入下一輪嘅遴選，佢因為知道香港都有唔少有影響力嘅牛津校友，所以特別嚟香港趁機拉下票。不過佢今次嘅對手都好強，對佢嚟講都會係一場苦戰。
喺飯局裡面，與會者都好暢所欲言咁，交換對一啲問題嘅睇法，但係因為呢次聚會話明係用 Chatham House Rule，唔可以引述其他人嘅發言，所以我就唔可以喺度同大家分享，但係呢次飯局的確相當有趣，同有好大爭論性。
我諗唔少朋友都關注美國聯儲局早前宣布減息半厘，呢個幅度係相當狠，我好相信呢個減幅唔係全部從經濟角度考慮，反而係一個好有相當大政治含量嘅決定，好多人都話係送畀民主黨總統候選人賀錦麗嘅一個大禮。不過到 12 月選舉之後，聯儲局嘅減息幅度就應該唔會再咁進取，估計最多只會去番 25 個點子。
聯儲局之前已經放晒風話減息，所以市場早就消化咗呢個消息，股市亦提前做咗相應調整，嚟緊大家應該留心通脹會唔會再彈起。香港嘅銀行今次就冇跟足聯儲局嘅減幅，只係將最優惠利率下調 0.25 厘，對一般供樓人士嚟講，負擔減輕幅度都係好輕微，而呢個減息幅度，又未至於會成為刺激樓市嘅好大動力，不過，始終減息都係對經濟嘅好訊息嚟。
更多美國減息對香港樓市影響分析
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
