專欄｜投資港股所為何事？畀錢上市公司再派息畀自己

派錢呀！平安好醫生（1833）突然宣派特別股息，每股派9.7元，派息金額超過股價一半，但又係咪真係咁益街坊、益股東呢？

其實股價表現已經說明一切，平安好醫生宣布派息之後大高開，一度衝上18.3，升幅超過兩成半，但收市埋單計升幅剩返2%，正宗高開低收。投資者一個唔好彩高位衝入場，單日損手接近18%。

今次派息涉資巨大，就算大股東平保（2318）選擇「唔收錢」、全數「以股代息」，平安好醫生都要派成65億元。

之但係，公司上市以來，一直處於虧損，2019至2023年五個財年累計蝕41億元，喺2023年上半年首度錄得中期純利5,664.8萬元人民幣，但全年亦要蝕3億幾人仔。

平安好醫生巨額派息的資金來源

派息？錢從何來？

原來一切只係羊毛出在羊身上。為咗今次派息，平安好醫生要大手調撥2018年上市同2020年高位配股集得用剩嘅資金。

公司喺2020年以每股98.2元，配股集資近79億元，如果呢批投資者今日仲未離場，帳面計，已經係每10蚊成本，跌剩一個半，今日話會派返1蚊俾你，認真多謝晒。

問題係，當年配股時銷售文件話用呢筆錢去擴大醫療團隊、研發開支、會員產品多元化、擴大銷售團隊和網絡、合併收購等等。

大拿拿七十九億銀紙，四年之後只係使咗六億幾銀，剩返嘅72億，一個唔該拎晒嚟派。

說好的合併收購呢？說好的拎嚟發展呢？

如果下次平安好醫生又再伸大手板問市場攞錢，試問投資者又會點諗呢？

不過又咁講，平保今次如果「以股代息」增持超過2%，就會觸發強制性全購要約。理論上，即係小股東可以用「以股代息」作價向平保沽貨，純以計數角度睇，呢啲價蝕本門有限，而贏面都幾高。

只係唔好忘記，投資者買得科技平台股，緊係希望有高增長，派完錢之後，平安好醫生手頭現金大減，未來併購、燒錢發展嘅幻想空間大減。

今時今日港股投資者買少見少，日本、印度等新對手就越嚟越強勢，市場資金越分越薄，平保作為大股東應該及早表態，到底係諗住收息定收股。平安好醫生管理層亦應該要及早向投資者說好平安好醫生的故事，講解返公司未來發展大方向。