喺投資銀行工作，如果你做ECM，會有好多機會出trip，同客人做盡職調查，以考究佢地是否符合上市規則。入行半年，Joseph等到一個上市項目，可以出business trip，佢十分期待。不過，其實business trip冇想像中咁好⋯⋯
呢一個上市項目，客人係一間中國公司，大部分辦公室、廠房、分店設於中國，但唔係北京、上海、深圳，而係無錫、徐州、淮安。一收到行程，Joseph見到自己只可以去二三線城市，已經唔多開心。
「頂，去New York、London呢啲，只會喺電視劇上出現⋯⋯」上機當日，Joseph話。
「咪天真啦細路，個客係中國公司你一早知，去二三線城市係基本。就算去外國呀，都係啲senior去晒，邊有你份呀。」同行律師Ray笑佢。
嗰一刻Joseph先明白，嚟香港上市嘅主要係中國公司，所以business trip七成係去中國。唉，不過有得出trip都好呀，應該好玩掛？佢仲有一絲希望。
到埗之後，一切一切，將呢一絲希望扼殺埋。
畢竟Joseph去嘅並非大城市，設施一定落後啲，作為少爺仔嘅佢，真心嚇親。一落到地，客人已安排專車接送。但係，去酒店嘅路途崎嶇，成程䟴下䟴下咁，仲要䟴咗成個鐘先到，令人十分疲累。
終於落車，客人已經預訂咗全市最好嘅酒店，然而，最好亦只係一間三星酒店，Joseph見到房間浴缸又冇，落地玻璃又冇，已經唔敢對第二日嘅早餐有期望。
「頂⋯⋯好彩臨出門時，阿媽塞咗條毛巾落我袋，呢間酒店啲毛巾，我真係唔敢用⋯⋯」晚飯時段，Joseph向Ray苦訴。
「係咁㗎啦，第一次出trip？」Ray習以為常。
「我真係第一次⋯⋯」Joseph一臉悲傷。
以上情況，Joseph只係悶悶不樂，未去到慌張。直到拜訪客人，佢先出事。
去到客人工廠，一行人周圍參觀，又訪問咗唔少管理層，搞咗成大半日。Joseph人有三急，就去洗手間。佢入咗去三秒，行返出嚟，撞到Ray。
「喂你唔係去廁所咩？」Ray問。
「Ray⋯⋯呢一個係廁所嚟？」Joseph極力保持冷靜，指住洗手間入面，冇門隔住、冇抽水系統嘅旱廁。
「係呀，係咁㗎啦。呀係喎，你係00後，應該冇見過旱廁。試下佢啦，而家好少旱廁㗎啦，呢一個機會好難得。」Ray神態自若，對Joseph十分諷刺。
「X！X佢XX！呢一個唔係廁所嚟㗎，呢一個只係屎尿儲存庫，你叫我點喺個坑上面屙屎！」Joseph崩潰大罵。
「所以今朝我咪冇乜點食飯囉。」Ray聳一聳肩，行入洗手間。
「頂⋯⋯」Joseph冇辦法，佢真係好急，唯有入去處理生理需要。喺旱廁上面嗰十分鐘，係佢人生最長嘅十分鐘。
行出洗手間嗰一刻，Joseph成個人唔同晒，佢冇咗朝氣，一臉呆滯。之後三日，佢一直沉默寡言，懷疑人生。
五日四夜嘅business trip完啦，上到飛機，Joseph主動開口：「Ray，我好掛住香港，我好掛住我阿媽。」
「哈哈，下次唔好對business trip有期待啦，傻仔。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
