0
0

「股神」巴菲特旗下投資旗艦巴郡(Berkshire Hathaway)最近舉行年度股東大會,會上巴菲特同佢嘅拍檔芒格就美國經濟、人工智能、汽車行業等熱門話題分享自己嘅睇法,仲講到明唔睇好某啲行業同領域嘅未來發展。

一齊睇下股神佢哋喺股東大會講咗啲咩,可能會對你未來嘅投資部署有幫助!

美國經濟前景面臨挑戰 加密貨幣唔會成為世界貨幣

巴菲特表示,今年經濟恢復嘅速度稍微放緩,公司業務經歷咗好多波動,可能係二戰以嚟最厲害嘅一次。
雖然對美國債務上限問題存在憂慮,但巴菲特認為美元嘅儲備貨幣地位唔太可能被取代,不過未來會點就比較難講。
講到加密貨幣嘅時候,股神直接叫大家「忘記呢啲玩具(加密貨幣)」,仲話如果有人覺得任何一種代幣可以取代到美元成為世界貨幣,咁真係一個笑話。

美國銀行業及商業地產市場面臨危機

巴菲特表示,如果喺矽谷銀行倒閉時,矽谷銀行嘅存款不獲擔保,會帶嚟災難性影響。
巴菲特都有提到美國商業地產潛藏嘅危機,認為房地產市場嘅價值,其實取決於借貸借到幾多錢,但目前開始睇到呢個後果:「之前(商業地產領域)有過度借貸嘅傾向,但依家開始借貸困難。」

對AI持懷疑態度

巴菲特認為,發明AI嘅初衷係好嘅,AI可以做到好多不可思議嘅事,但佢又有啲擔心AI會好似二戰期間發明嘅原子彈一樣,冇辦法完全被掌控。

後悔賣蘋果股票

巴菲特話,蘋果係好好嘅業務,利潤率同用戶忠誠度都高,同消費者關係密切,而且因為蘋果會不斷回購股票,所以巴郡唔需要做啲咩,持股價值就會上升。巴菲特直言,之前巴郡賣過部分蘋果股票,呢個係一個愚蠢嘅決定。

減持台積電原因:地理位置

上年年底,巴郡用超過40億美元買入台積電,但隔咗幾個月就減倉。股神一直都話,投資應該要「Buy and hold」,所以當時嘅「快閃」操作真係好罕見。今次股東大會,股神就為當時嘅操作解畫。佢大讚台積電係一間好公司,但佢唔鍾意台積電嘅地理位置,仲話覺得巴郡喺日本部署資金,比喺台灣部署資金更令佢放心。

唔想做Elon Musk對手

股神同芒格覺得Elon Musk高估咗自己,不過佢好有天賦,係一個好聰明嘅人,致力於解決冇可能實現嘅事。巴菲特仲講到,自己同芒格都唔想同Elon Musk展開競爭。

唔會投資汽車製造商

巴菲特同芒格一致認為,汽車產業嘅競爭太激烈,全球各地都有好多競爭對手,所以好難長期喺呢個產業入面佔一席之地。比起汽車製造商,佢地更傾向投資汽車經銷商。芒格補充:「電動車未來會大獲成功,但佢目前都帶嚟巨大嘅成本同風險,而我唔鍾意巨大嘅成本同風險。」


更多最新最熱最有用財經金融地產資訊 請即登記成為Finance730會員

歡迎讀者投稿,稿件請投至finance730hk@gmail.com

▼追蹤Finance730 動向 官方網頁

▼緊貼最新市場走勢? Facebook

▼投資教室 專題研究? YouTube

▼消閒生活 時尚品味? Instagram

發佈回覆