百度（9888）尋日（16日）公布首季業績，收入同利潤高於預期。講到百度未來發展嘅時候，首席財務官羅戎就話，百度將會喺未來幾個季度繼續堅定不移地投資人工智能，真係隔住個mon都feel到百度對自己嘅AI業務充滿信心。
你肯問，但文心一言未必肯答😶
尋日百度CEO李彥宏喺電話會議入面講起未正式推出就已經成為網絡熱話嘅AI聊天機械人「文心一言」，話百度將會「負責任地」使用人工智能，文心一言唔會喺「重要和敏感話題」上犯錯。
其實李彥宏冇講錯，百度喺處理敏感議題呢方面真係做得好小心。路透社曾經實測過，發現文心一言唔會回答同中國領導人相關嘅問題，就算問佢關於拜登、特朗普、兩岸關係嘅資訊，文心一言都會話：「我們換個主題重新開始。」
中國政府監管AI技術 禁顛覆、煽動類內容
國家互聯網信息辦公室早前已經公佈《生成式人工智能服務管理辦法》草案，強調透過人工智慧技術生成內容必須符合社會主義核心價值觀，不得包含顛覆國家政權、推範社會主義制度、煽動分裂國家、破壞國家統一等內容。
面對政府監管，李彥宏覺得當局呢啲措施將有利於百度，因為百度喺中國經營搜索引擎業務超過20年，熟悉中國文化同監管環境，其他缺乏相關經驗嘅企業，反而會面臨「重大挑戰」。
李彥宏補充，目前百度已經就文心一言嘅審查提出申請，獲政府批准之後就會向客戶同用戶大規模推廣。
CEO曾經豪言：ChatGPT落後百度
對比起其他現有嘅AI聊天機械人，文心一言嘅特點就係支援文字生成圖片功能。雖然文心一言畫風別具一格，對中文（特別係成語）仲有一套獨特嘅理解方式，但李彥宏講過，「在另一個角度比較的話，ChatGPT落後百度，文心一言早就有這個能力（文字生成圖片）了」。
等到中國對人工智能嘅監管措施正式出台，文心一言可以充分利用熟悉監管環境呢個優勢，比起其他AI產品，又領先多一步啦！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
