「無Netflix睇點算呀？世界末日喇！」放心，只要你肯乖乖畀錢係唔會有事嘅（鬼唔知咩…）事緣串流影音平台Netflix打擊共享帳戶嘅行動終於殺到埋身！一眾台灣用戶今朝率先收到Netflix溫馨提示話「Netflix帳戶僅供同住者使用」，講到尾都係錢嘅問題啫，但而家個問題係，幾多先？新收費下，每一個非同住用戶每個月要畀多100新台幣（折合約$25港元）。喺各大社交媒體見到，唔少台灣網民嘅反應可以話係崩潰（證明幾多人係寄生蟲啦…）。
好多人為咗慳錢，都會同朋友或者屋企人夾份訂閱Netflix、Disney+同YouTube Premium等平台嘅收費計劃。新增客戶增速放慢嘅Netflix一早就想解決「寄生蟲」問題，上年已經開始對拉丁美洲嘅共用帳戶收費，今年2月再宣佈喺加拿大、新西蘭、葡萄牙同西班牙實施限制共享帳戶嘅計劃，今次仲將相關措施擴展到美國、巴西、新加坡等國家同地區。
打擊「寄生蟲」政策見效 Netflix日均訂戶數增1倍（6月13日更新）
據分析機構Antenna數據顯示，自Netflix於5月23日致信美國等逾 100 個國家的用戶打擊「寄生蟲」後，新訂戶數於5月26日和27日均超過10萬人，而計及打擊「寄生蟲」信後平均每日註冊率達到 73,000 人，較過去60日平均數增加102%，遠超疫情初期的情況。
根據Netflix嘅公告，Netflix由即日起會send email畀同非同住者共用帳戶嘅台灣用戶，用戶可以選擇將使用者轉移去另一個會員帳戶，咁就可以將原有嘅觀看清單同使用偏好設定直接帶去新account；用戶亦可以選擇每個月額外畀多100新台幣「購買額外成員」，咁用戶就可以同唔係同住嘅屋企人同朋友共用Netflix帳戶啦。
不過唔係所有用戶都可以購買額外成員，例如月費270新台幣嘅基本方案就僅限同住者使用，而標準方案（月費330新台幣）用戶同高級方案（月費390新台幣）用戶就分別可以新增1名同2名額外成員。
香港用戶都要課金？
睇返Netflix嘅香港區方案及價格表，標準同高級方案已經多咗一行「可將 1/2 位與您不同住的人新增為額外成員」嘅說明，方案內容大致上同台灣一樣，基本、標準同高級方案嘅收費分別係63港元、78港元同93港元；如果新增額外成員，每位每個月需要額外支付28港元。
Netflix點知用戶係唔係一齊住？
有台灣用戶就表示困惑，因為如果Netflix要禁止分開居住嘅人共用帳戶，咁點解用戶去旅行嘅時候仲可以繼續用到Netflix呢？好似單靠check IP地址都解決唔到呢個問題啵。
根據Netflix之前公佈嘅資訊，Netflix會透過IP地址、裝置識別碼、帳戶活動等多種資訊判斷登入裝置係唔係同戶裝置。如果有唔屬於同住者嘅裝置登入Netflix，咁帳戶擁有者就要用主帳號嘅電郵地址或者電話號碼完成驗證，驗證完先可以喺新裝置上面使用Netflix。但成件事搞到咁複雜，有網民就建議Netflix不如直接出個family plan算啦。但而家錢就收硬你㗎喇，你會選擇額外課金，定係直接棄用Netflix呢？
早前Netflix相關報導：
Netflix十年來首次錄用戶流失 推算1億戶「寄生蟲」無畀錢
FreeRider噩耗！ Netflix非同住用戶額外收費3地區試行
Netflix寄生蟲末日 非同住者位位加$28
歡迎讀者投稿，稿件請投至finance730hk@gmail.com
▼追蹤Finance730動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
