香港又冇咗一個「國際第一」喇，不過呢個第一對於香港市民嚟講真係唔算係好嘢——講緊嘅係人力資源顧問機構ECA International每年公佈嘅全球最高生活成本城市排名，香港之前已經連續四年成為「世一」，但今次就被紐約超越，排名下跌至第2位。
紐約過去幾年都喺呢個排行榜中名列前茅，今年受通貨膨脹同當地住宿成本上漲影響，再加上美元強勢，終於成功超越香港登頂。雖然香港嘅商品同服務價格都有上升，但呢啲影響都被下跌嘅租金成本抵消，導致香港排名下降。日內瓦連續三次排喺第3位，倫敦同新加坡分別排名第4同第5。
中日排名急跌 新加坡逆流而上
大部份亞洲城市因為通脹率低，導致排名係咁跌，跌得最多嘅應該就係受到貨幣貶值影響嘅中國同日本。東京曾經喺2019年同2020年被選為全球生活成本第二高嘅城市，但呢兩年排名一跌再跌，由上年嘅第5名跌到今年第10名，再跌落去，分分鐘下年嘅頭十名就冇東京份。仲有三年前排喺第10位嘅橫濱，排名持續插水，今年仲由第17名跌到變第41名。
至於中國方面，雖然上年排第8、第9嘅上海同廣州依然係內地生活成本最高嘅城市，但喺全球嚟講，今年佢哋已經跌出前十名，只係排喺第13同第14位。
不過喺其他亞洲城市生活成本相對低咗嘅同時，新加坡嘅排名反而急升8位，成為全球生活成本第五高嘅城市，一嚟新加坡嘅通脹率比其他地方低，二嚟係因為新加坡比起其他亞洲地區更早放寬防疫限制，一定程度上推動新加坡嘅住屋需求增加，令新加坡嘅住屋成本上漲，排名隨之上升。
