李嘉誠商業帝國百足咁多爪，做佢「紅顏知己」注定係空中飛人，幫手消災解厄。據報周凱旋最近就因為一間李氏施下台灣財經媒體嘅「IT災難」而飛咗去台灣。
話說喺今個月8號，台灣老牌財經雜誌《商業周刊》（下稱《商周》）伺服器遭黑客入侵，整個資料庫被挾持，過去39年來所積累嘅文字同影像資產隨時凍過水。
商周隸屬城邦媒體 背後為李嘉誠系內TOM集團
商周隸屬於城邦媒體，而城邦的背後就係李嘉誠一手創辦的TOM集團（2383）。翻查資料，TOM集團於2001年1月以新台幣16.5億全面收購《商周》母企「商周集團」，隨後成立城邦媒體控股集團。
眾所周知，周凱旋一直湊住超人嘅「第三個仔」李嘉誠基金會，而今次李氏旗下傳媒「後院火燭」，佢自然唔會坐視不理。台灣媒體FTNN新聞網（隸屬鋒燦傳媒）就話周凱旋日前已經親自飛抵台灣，聯同TOM集團首席執行官兼執行董事楊國猛（Ken Yeung）一齊拆彈。
超人嘅王國伸到邊，周凱旋嘅航線就飛到邊。依家誠哥賣英國資產，手頭全部都係Cash，唔知今次周凱旋飛台灣，會唔會順便睇吓有咩生意買黎做手信呢～
