近日有兩名乘客喺乘搭加拿大航空（Air Canada）嘅航班時，因為座位有嘔吐物而向機組人員要求調位，但機組人員以航班冇多餘空位為由，拒絕咗佢哋嘅請求，兩位乘客只可以繼續坐喺原位忍受嘔吐物嘅味道。點知機長突然行出嚟，話要趕呢兩位「對機組人員無禮」嘅乘客落機，仲揚言要將佢哋列入禁飛名單。坐喺附近嘅乘客睇唔過眼，認為兩位事主嘅言行並無不妥，於是事後喺社交媒體上分享呢段經歷以及公開向航空公司投訴，希望為兩位乘客討回公道。
機組人員未有徹底清理座位上嘅嘔吐物
一位名為Susan Benson嘅Facebook用戶發文分享佢日前乘搭AC1706班機遇到嘅一段小插曲。當日有兩位女士同一位先生坐喺Benson前面嘅座位，不過佢哋一坐低就聞到一陣惡臭，仔細一望先發現佢哋嘅座椅同安全帶都濕濕地，座位周圍仲有殘餘嘅嘔吐物。
Benson推測，應該係上一班航班嘅乘客喺座位上嘔吐，但機組人員事後冇徹底清理座位上嘅嘔吐物，只係喺快速處理完之後，試圖用咖啡粉同香水掩蓋臭味。
空姐拒絕換位 機長要趕乘客落機
由拉斯維加斯飛往蒙特婁要成5個鐘，試問邊個可以忍受全程坐喺一堆嘔吐物隔籬？受影響嘅乘客即刻搵空姐幫手睇下可唔可以調位，不過空姐只係向佢哋道歉，並表示航班已滿，冇多餘嘅座位可以畀佢哋坐。乘客同空姐爭論咗幾分鐘都係解決唔到問題，最後唯有問空姐拎幾張毛氈墊住，同埋拎啲濕紙巾清潔座位。
原本以為事情已經告一段落，點知呢個時候機長突然出現喺兩位女乘客面前，要求佢哋自行落機並自費改搭其他航班，如果唔係佢哋就會被保安「護送落機」，仲會被列入禁飛名單。兩位女乘客追問機長佢哋做錯咗啲咩，機長就表示係因為佢哋無禮對待機組人員。
旁觀乘客打抱不平
Benson認為呢兩位乘客只係有啲唔開心同語氣堅定（upset and firm），但絕對唔係粗魯。當時旁邊嘅男乘客都忍唔住出聲幫兩位女士辯護，指出佢哋嘅座位上真係有嘔吐物。不過機長冇理會幾位乘客，之後兩位女士就被保安帶走咗。
Benson喺貼文中表示自己唔知兩位女乘客係唔係真係被列入禁飛名單，但佢認為佢哋只係唔想喺長達5小時嘅旅程中忍受嘔吐物嘅臭味，事實上佢哋咩都冇做錯，冇理由要為此被趕落機。Benson已經直接向加拿大航空投訴，以及將呢件事分享到唔同嘅社交媒體平台，佢仲話希望兩位女乘客可以搵到一個好律師並起訴加拿大航空。
加拿大航空喺回應傳媒查詢時冇直接否認Benson貼文中嘅指控，其發言人表示航空公司正就事件展開調查，佢哋會直接聯絡相關嘅乘客並跟進事件。
更多航空公司相關投訴事件
空姐又出事｜今次不滿講中文？日籍乘客咆哮被華航趕落機
美航機師1分鐘「訓導」廣播爆紅 告誡乘客「睇片要戴耳機」
又係國泰 又係歧視？內地網民控訴因不懂粵語被歧視 拒絕國泰跟進
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
