上回提到，一位好嘅mentor有助你嘅事業發展。今次分享，一位唔好嘅mentee，可以激到你扎扎跳。成立hkibankmemes後，我搞過Mentorship Program，亦同過兩三位大學生coffee chat。我同其他mentors遇到嘅mentees，好嘅佔九成。不過，唔好嗰一成，足以激死我地。以下呢啲低級錯誤，希望大家極力避免，留個好印象畀mentors。
第一，叫錯名。自我介紹一下，我叫阿晞。遺憾的是，每日我收到嘅訊息入面，有一半會叫錯我個名，「希」、「熙」、「熹」、「羲」，你諗得出嘅「晞」同音字都有。叫錯一次唔緊要，一開始我會澄清返自己叫「晞」，但對方完全冇理會，繼續叫錯，於是我放棄了。唉，你鍾意啦。老實說，你搵得一個mentor，唔多唔少係因為你欣賞佢，覺得佢有地方值得你學習，先會邀請佢coffee chat，向佢請教。既然你欣賞佢，請有返基本尊重，諗清楚人地個名點叫，先作出邀請，否則第一印象已經衰咗。
第二，唔識遷就mentor時間。試過有mentee問mentor幾時可以見面，mentor提供咗三四個時間，畀mentee去揀。點知mentee竟然話自己要去玩，或者地方太遠，唔可以見面。大佬呀，而家係你求人同你見面，指教你一兩句呀，人地份工咁忙，你又提供唔到誘因，緊係你就佢啦。即使你唔想就，都唔好同人講你去玩啦。如果你真係好忙，可以一開始就建議一個時間，睇下對方可唔可以配合，或者以電話、視像通話等方式交流，方便大家。
第三，未有offer就問人點揀。有一位mentee搵緊工，佢問mentor HSBC嘅DCM好，定CICC嘅ECM好，mentor固然會問兩份工嘅package係咩。點知mentee竟然答唔知，因為佢未報。唉，你有得面試，人地都未必請你，更何況你連工都未報，有咩好討論呢？不如努力搵工、面試，到真係有offer，先拎份約問人意見啦。
以上例子係好極端，但總有人錯，希望你唔係其中一個。好多人做mentor都係冇錢收，有時仲會出錢請食飯，佢地做mentor，真係本住教人嘅心去做，希望幫到年輕人。各位mentee請珍惜，唔好激死mentor。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
