以下困境，相信好多單身女性會遇上。純粹地，阿晞以投資銀行單身女性嘅角度，向大家吐下苦水。
三年前，我同一位新娘去試姊妹裙。試完之後，我笑言：「唉，大家開始結婚啦，我連男朋友都冇，真係大鑊。」估唔到，新娘認真回答：「唉，阿晞，你一直單身，咪就係因為你太挑剔囉。」
「吓？我係咩？」我嚇一嚇，反問新娘。
「緊係啦，你唔講我都知。」新娘一副看透了你嘅表情，語重心長話：「你讀到碩士，返份咁嘅工，又鍾意扮靚、買袋，你嘅男朋友都要有返咁上下啦。問題係，香港男性之中，你要搵一個靚仔、高學歷、高收入、養得起你嘅人——仲要單身，真係冇乜可能囉。唉，你不如降低下擇偶要求啦⋯⋯」
What the……一時之間，資訊量太多，我真係反駁唔到。咩叫「咁嘅工」？投資銀行有咩問題？我幾時有話要靚仔？點解我要一個人養我？我唔識養自己？救命，我從來冇提起過擇偶要求，點解我會建立咗一個咁嘅形象？
第二日，我同女同事傾起，先發現好多單身女同事有相似遭遇。我地得到嘅批評不一，但一定會與事業掛鉤。
唔知由幾時開始，如果你嘅條件不錯，但廿幾歲人仲係單身，就代表你挑剔。以投資銀行為例，如果你做front office，成日要見客，唔多唔少識得打扮，可能有人覺得你注重外表，一定要男朋友靚仔。然後，你喺投行返工，人工比同輩高少少，又會有人覺得你搵得多，會要求男朋友搵得更多。仲有，你嘅客人、同事、社交圈子，全部係專業人士，你又點會接受到男朋友唔係？嘩，你一定要求好高啦。
唉，學Matt哥講句：「哭X咗。」我嘅工作係咁姐，我冇話男朋友都要呀嘛。我單身，你估我想㗎？施主，拍拖要緣份呀⋯⋯
我唔係話所有人都先入為主，亦唔係話單身女性一定唔挑剔。不過，如果各位認識單身女性，希望可以畀啲空間佢，唔好假定佢係因為個人條件不錯，而擇偶挑剔，可能佢地未必係咁，只係緣份未到呢？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
