新一年即將來臨，代表大家就快拎花紅。好多人等到花紅，就會轉工。因此，年頭係轉工嘅黃金時期。
講起轉工，令我諗起Luke嘅金石良言：「山水有相逢呀女。」
話說兩年前，Fiona搵到新工，由一間中資投行，轉去一間美資投行，繼續做ECM，人工高咗四成，仲升咗一級，佢十分興奮。其實現職公司待佢不薄，老細好人，團隊和睦，花紅有十二個月。不過，新公司更加吸引囉。
Fiona遞信當日，老細客客氣氣，知佢有更好嘅發展，亦祝福佢更上一層樓，不過提出咗一個要求：「Fiona，你知Project K就close㗎啦，你又係負責同事，呢一個月會好忙，希望你可以盡力做埋佢。」
「明白。」Fiona當下答應咗，但心入面十分猶豫。
「唉，我都就走啦，個客上市嗰日呀，我已經唔喺道，Listing Ceremony都冇得去，仲同佢日日挨夜做，好似唔係好抵囉。」食飯嗰陣，Fiona向我地表達心中不滿。
「哈，你老細咁傻㗎，做咗幾十年嘢，都唔明打工仔心態？你都就走啦，點會同佢搏命呀。」我笑言。
「咪就係，我真係唔明點解臨走佢都想使盡我。」
「算啦，你新工又搵咗，bonus又攞咗，緊係唔理佢，hea做算啦。」我支持Fiona偷懶。
「阿晞，你唔好水人啦。」呢個時間，大我地幾年嘅Luke出聲：「山水有相逢呀女。」
「吓⋯⋯邊有咁易呀。」我納悶。
Luke轉向問Fiona：「我問你，你老細平時對你好差咩？Bonus分得多唔多？」
「唔係⋯⋯bonus okay嘅⋯⋯但又唔係好錫我嗰種囉。」Fiona回想。
「佢冇好錫你，但又冇恰你，即係做咗老細本分呀。咁你咪公平啲，做返員工本分囉。呢一個project，我唔係叫你仆心仆命去做，不過又唔好hea做。呢一行唔係好大㗎咋，日後仲有機會撞到，分分鐘下一次IPO，你同佢做Joint Sponsors𠻹呀。你臨走hea做，畀手尾佢跟，日後撞到，我問你點好？」
「咁你又啱⋯⋯」我地兩個被說服咗。
於是，離職前一個月，Fiona做好本分，挨埋Project K，妥善完成交接，再安心離開。
故事未完㗎。
一個月後，Fiona過唔到試用期，俾新公司炒咗。Well，美資投行嘅名氣、發展、待遇好好多，但環境亦嚴峻好多，一做得唔好，達唔到老細要求，即炒冇情講。你可以話Fiona冇實力，亦可以話佢不幸，總之佢冇咗份工。
喺佢最崩潰嘅時候，有人伸出援手——舊老細主動搵佢，叫佢返去做：「我地仲未請到人replace你呀，但仲忙緊，做生不如做熟，你返嚟囉。」呢一個offer，簡直係雪中送炭，挽救咗Fiona份CV。
Fiona對舊老細心存感激，但係，佢更加多謝Luke。如果當日唔係Luke勸佢做好本分，佢選擇咗hea做，傲慢地應付舊老細，今日，佢未必返到去舊公司工作。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
