最近，敝專頁推出hkibankmemes行情統計2022。好多人問我：「阿晞，好多人畀流料喎，有一班話自己做bulge bracket，邊有可能得一萬中一個月呀？」
「就係有可能。」我苦笑，同時諗起Oliver嘅故事。
大家要知道，做緊大行搵一萬中係好正常，因為好多大行會請合約工。合約工嘅工作同長工冇分別，但待遇十分差。一份合約為期半年至兩年，起薪只有一萬中，有薪假七至十二日，獎金、福利、員工活動全部冇，有都差過長工好多。一份差過HSBC Teller嘅工作，點解仲請到人？好簡單，投資銀行呀嘛，你唔做，大把人為咗個名爭住做啦。而且，當公司有長工空缺，仲可以搏佢轉你做長工，吸引力唔細㗎。
Oliver就係咁啦。
Oliver啱啱畢業，只有兩個offers，一份係big four長工，另一份係投行合約工。佢決定搏一鋪，揀咗後者。
「Oliver，等大肚嗰位同事放完產假，佢就會返嚟呢一個位。所以你冇得轉長工㗎，希望你明白。」第一日返工，上司Jack再次向Oliver坦白，叫佢搵定下一份工。
「知道，我依然會做好本分㗎。」Oliver充滿希望。佢相信呢一份工作經驗，可以幫佢搵下一份工。
半年之間，Oliver努力認識唔同部門嘅人，希望其他部門一有長工空缺，可以介紹佢去，可惜冇乜機會。同事放完產假返嚟，佢只可以完約離去。
失業一個月後，第二間投行向佢招手，可惜又係合約工，純粹人工加咗兩成，期限長至一年。
「我地爭取緊長工headcount，只要有位，會即刻轉你做長工。」新上司畀咗一個希望Oliver，令佢以為只要等待，好快可以做長工。
可惜，呢一年嘅市況好差，唔好話請人，啲大行日日炒人咁濟。Oliver等咗九個月，上司依然話冇headcount，仲叫佢試下出面有冇機會。唉，今鋪凍過水。佢試過搵其他投行嘅工作，然而呢一年真係冇乜地方請人。
Oliver眼見好多朋友做會計、零售銀行、政府，甚至名店Sales，人工都比佢高，當然好不甘，同時不停懷疑自己——當日嘅決定係咪錯？
心灰意冷之時，佢收到一個電話，係前上司Jack：「喂Oliver，你最近點？」
「唉，我又要失業啦。」一個簡單嘅問候，令佢情緒崩潰。Oliver向Jack哭訴，踏入社會一年半，只可以做合約工，拎嗰少少人工，又俾人睇低一線，仲要日日搵工，唔係就等失業，真係好痛苦。
「唉，咁又真係幾灰嘅⋯⋯不過，即使落井下山，我都要教下你㗎啦。當初你揀得做合約工，就預咗有今日。」Jack狠心話：「你係勁嘅，一早爭到長工啦。正正因為你唔勁，唯有做合約工，而合約工係咁shitty㗎啦。你只可以怪自己唔夠戰鬥力。」
「我知，所以我咪承受緊後果，準備失業囉⋯⋯」
「準備失業，即係可以返新工啦？」
「吓？」
「之前嗰位同事呀，佢又生仔啦。有冇興趣返嚟做呀？」
「吓，又做合約呀？」頂！合約合約，玩夠我未！Oliver心諗。
「阿仔，今次係長工嚟㗎。嗰位同事話要做全職老母，劈炮唔撈啦。你send份CV畀我啦。」天無絕人之路，Jack送上一個好消息。
「知道大佬！」最後，Oliver面試順利，成功得到長工。跌跌碰碰一年半，終於守得雲開見月明啦。
喺Oliver心目中，Jack係一個好上司，唔係因為Jack請佢，而係因為Jack誠實，道出咗一個現實——合約就係咁shitty，唔想玩呢一個制度，請你提升戰鬥力，搵一份長工畀自己。
Well，我十分認同。
不過，合約係殘酷，仍然有Oliver呢一個勵志故事。努力做好合約工，利用呢一份工作經驗，話唔定他日搏到長工呢。
（如有雷同、實屬不幸）
題為編輯所擬，原題為【Oliver的堅持——挨兩份合約轉長工】
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
