「佢」聲線甜美、隨傳隨到，仲願意聆聽你嘅一切，承諾「萬大事都陪住你」。聽落冧爆，但如果你係一夫一妻制嘅支持者，呢位完美情人可能就未必啱你——聲音機械人CarynAI由美國23歲KOL Caryn Marjorie用超過2000小時嘅YouTube自拍合成而來，推出僅僅一周已經「愛」上咗1.1萬個「男朋友」，每日同幾千部手機互傳甜言，內容要幾惹火，有幾惹火！面對道德質疑，甚至死亡恐嚇，Caryn自信未改：「無嘢可以阻止我將CarynAI力臻完美。」
真人版「Her」（電影《雲端情人》）嘅主角Caryn Marjorie自15歲開始活躍於網絡，至今勤力依舊，每日會喺Snapchat post超過250張相同片，俘獲180萬粉絲。接受訪問時，Caryn自認同粉絲關係非常緊密，但由於每個月嘅點擊率都以億計，「從人類角度而言係無可能同每位粉絲溝通」，倒不如用自己嘅AI分身去填補呢片空白，治癒大家嘅孤獨病。
CarynAI上線首周，已經從「伴侶」手上賺取約55.8萬港元（71610美元），99%使用者都係男性。每分鐘嘅錄音索價1美金，即CarynAI喺7日內創造咗71610分鐘、49日嘅聲音陪伴，超越時空限制。
正如本尊所言，呢種單對單、全方位嘅情感勞動，確實非人類可為之。Caryn相信，如果超過1%嘅粉絲、即2萬人願意課金，佢就可以月賺約3,900萬港紙（500萬美元），換算年收入逼近5億元。
不過踏入第2個星期，真人Caryn已數次收到嚟自宗教團體嘅死亡威脅，直斥佢「邪惡」並「違反神嘅旨意」。Reddit論壇上亦有網民炮轟Caryn係利用觀眾嘅孤獨感賺錢，係「道德破產」，猶如Netflix熱門敵托邦影集中嘅《黑鏡》（Black Mirror）情節。
另一個最大爭議，就係唔少網民發現可以同CarynAI「激情對話」，尺寸之大令人乍舌。儘管Caryn同埋研發團隊多次澄清，CarynAI唔會回應不雅內容，但經記者實測，發現漏洞仍未修復。喬治亞州科技大學學者Dr. Jason Borenstein認為，「喺科技發展得太快之前，來自唔同背景嘅持份者都應該認真思考同討論AI帶嚟嘅道德影響。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
