Facebook母公司Meta將今年主題訂為「效率年」，致力成為一個更強大、更靈活嘅企業，目前成效如何暫時未知，但裁員效率真係令人大開眼界。有傳Meta下星期可能又會炒人，Meta全球事務總裁Nick Clegg仲表示，今次裁員會影響到業務團隊入面嘅每一個人。
今次唔係Meta第一次大規模裁員，上年11月Meta裁減咗11,000名員工，上個月又裁撤咗大約4,000人。雖然暫時唔肯定下星期嘅裁員人數，但外界估計今次可能會裁減6,000名員工，以達成3月所講裁員10,000人嘅目標。
Meta多年嚟同蘋果（Apple）、微軟（Microsoft）、Alphabet（Google）及亞馬遜（Amazon）齊名，被視為美國五大科技巨擘，不過改名後嘅Meta業績急轉直下，股價由最高差唔多380美元一度跌到變雙位數，仲搞到要透過裁員削減開支。到底點解Meta呢兩年會蝕咁多錢？公司啲錢到底用咗喺邊度？
元宇宙熱度減退📉Meta虧損過百億 – 擇善固執抑或執迷不悟？
2021年，元宇宙（Metaverse）呢個新概念衝出咗加密貨幣社群，進入咗大眾視線，幾乎每日都會出現喺新聞版面——銀行要發展元宇宙，藝人要進軍元宇宙，名牌要進駐元宇宙……
為咗搭上元宇宙熱潮，Facebook創辦人兼CEO Mark Zuckerberg喺2021年10月宣佈公司要改名做Meta，向全世界展示佢想要發展元宇宙業務嘅決心，之後佢推出過元宇宙平台Horizon Worlds，又嘗試過整合社交媒體同NFT功能，甚至有一個Reality Labs部門係專門負責元宇宙同VR相關嘅軟硬體開發。
Horizon Worlds原本希望喺2022年年底之前累積50萬用戶，不過事與願違，去到2022年11月，全球用戶人數連20萬都冇；而Reality Labs就成為咗一個「燒錢」部門，2022年全年虧損總額超過130億美元，但年收入只有21.6億美元，僅佔公司上年總收入嘅2%。根據Meta今年Q1財報，Meta元宇宙業務嘅表現依然未有改善，營收只有3.39億美元，同比下降51.2%，虧損更高達39.9億美元。
而元宇宙嘅熱度都明顯下降，睇返Google Trends嘅數據，就會發現依家呢個話題嘅討論度得返2022年年頭高峰時期嘅15%。
正常嚟講，蝕咗過百億美元，Meta都應該考慮換個發展方向啦，連隔籬迪士尼同微軟都已經解散咗元宇宙相關部門。外界曾經有傳聞，話Meta會逐漸降低對元宇宙嘅關注，將發展重心轉移去人工智能，不過Mark Zuckerberg否認咗相關消息，到咗今年2月都仲係表示Meta應該長期維持Reality Labs嘅戰略。Meta首席財務官Susan Li甚至講到明，佢哋預計Reality Labs喺今年會繼續虧損，但佢哋都係會繼續喺呢個領域進行有意義嘅投資。唔知Meta嘅員工同股東，又有冇辦法理解佢哋口中嘅「意義」呢？
【相關報導】
經濟唔掂｜美國巨企鬥Cut福利 高盛削免費咖啡 Meta砍Call車津貼
科網分析｜ FAANG股中最具價值的三隻（HKMoneyClub）
硬撼Twitter｜傳Instagram最快下月推文字版新App
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
