數碼化讓出差機會變少，打工仔若想寓工作於遊歷，不妨考慮新一種職涯選擇——數碼遊牧（Digital Nomad）。 數碼遊牧概念最早可追溯至26年前，有專家預言打工仔以後不需再回寫字樓工作，掀起平板電腦就能上班。
「數碼遊牧」一詞中的「數碼」 是指憑藉網絡通訊，與全球客戶溝通；「遊牧」即是以前古人坐在馬背上，邊跑邊吃，自給自足的生活形態。今日，香港有教育機構專門協助年輕人成為數碼遊牧，免費提供諮詢及實習計劃，亦有人主動與老闆商量，把原有職位改頭換面，實現隨地工作的自由。
告別朝九晚五的辦公室，闖進沒有福利保障、收入看似不穩的遊牧人生，到底是否值得？且聽每年飛遍歐亞的Karin（教育機構創辦人）和Kristie（廣告文案寫手）剖白：一機在手，是否真的足以養活自己？走過天地，又是否能夠實踐心中理想？
九十後香港數碼遊牧Karin – 高峰期一年外遊12次
傳統名校出身的Karin，身邊好友多是從事銀行、法律界的專業人士，自己卻偏愛闖蕩的自由，自大學便找了份容許「work from plane」的工作，專營人力資源諮詢，比現在的打工仔走前10年。
「那時的老闆覺得，只要我用電腦完成到工作，他便OK啦。」自那時開始，Karin便開始四處遊歷，最高峰試過一年搭12次飛機，酒店房和咖啡廳成了辦工的熱點。去年，Karin看準疫情與人工智能將令人類的工作模式改頭換面，故成立教育機構Futurist Lab，向客戶提供新時代的職涯建議。
其中一樣最特別的服務，要數免費計劃「NomadNow」——顧名思義，即是教人們如何加入數碼遊牧的大軍。
香港免費數碼遊牧訓練計劃「NomadNow」
「NomadNow」由Karin與本地非牟利組織合作，專為年輕人及有需要的轉介個案提供生涯輔導，旨在讓他們發現「無論本身所謂嘅起跑線係點，都有成為遊牧嘅可能性，不係只係可以打工」。
上一屆畢業生中，有同學由毫無市場營銷經驗，變成廣告公司的搶手人才。箇中關鍵是她在課程中嘗試開辦Instagram自媒體，集結全港NGO活動於一身，又圖文並茂向讀者宣傳，成功贏得潛在僱主的青睞。
「你讀邊一科，從來（與工作）冇太大關係，重點係你有冇嘗試做一啲項目，實驗當中又有冇訓練出特定嘅技能。」Karin憶述，該位同學原先讀的科目與推廣營銷完全無關，現在她卻能在實驗中重塑自己的可能性。
「無論起跑線係點，都有成為數碼遊牧嘅可能性」
Karin｜數碼遊牧、教育機構Futurist Lab創辦人
Karin：欲成為數碼遊牧 先要跳出線性思維
「香港學生普遍有呢個想法：首先揀文科定理科？之後考到咩成績？入到邊間大學？如此類推，講到工作時，思維都會似一條直線。」然而，Karin認為要加入數碼遊牧的首步，先要跳出線性思維，認清自我的多元性。
「其實我哋鍾意嘅事物係可以好多樣化嘅。當金錢、面子都唔係問題，放任天馬行空，你最想做到啲咩？」
Karin｜數碼遊牧、教育機構Futurist Lab創辦人
當然，面對財政現實，幻想過後終要仔細規劃。因此，對於有意投身遊牧的一眾，Karin就這樣建議。「第一步可以先保留全職工作，喺空餘時間先睇吓有冇自由身工作嘅機會。當開始搵到客戶之後，就可以逐漸建構個人品牌，用口碑吸引客流，逐漸自立門戶。」
Karin強調，生涯規劃從來不需要All-or-Nothing，簡單如一個週末閒餘的興趣，也有潛力慢慢積累聲譽，最後成為你的全職工作。
28歲港人Kristie：從4A廣告文員變數碼遊牧
今年28歲的Kristie正正由全職開始，主動與老闆商量轉成合約員工，換取隨處工作的彈性。獲得首肯後，她憑林林總總的自由接案，在1年間成功從4A廣告文員轉變成數碼遊牧，足跡遍及東南亞及歐洲。
「喺香港最差嘅情況，我試過發夢都同老闆開會『拋橋』。我覺得係一個警號，如果你發夢都喺道工作嘅話，代表佢真係會畀你好大壓力。」過勞壓力加上同事猝逝，讓Kristie意識到，死亡其實離自己很近。於是，她推翻曾經的生涯規劃，隨意Google「最佳的數碼遊牧地點」，便啟航飛往首站——泰國帕岸島。
旅居數月，Kristie第一個直觀的感受，是發現「每個人都擁有好多個Life，隨意都講到個幾鐘嘅人生故事」。她試過在海邊遇上電腦程式員，乍聊幾句才知道原來他是一位退役軍人，很後悔以前殺過人。
「每個人都有好複雜而有質感嘅故事。當我冇咗張（公司）卡片，而家都要開始慢慢去搵返自己係邊個。」
Kristie｜28歲香港人、數碼遊牧
遊歷一年，當中收穫豐碩，卻也險與死神擦肩——有次Kristie因誤信友人邀請「坐車兜風」，最後差點喪命於失控故障的越野車。「我冇諗過故事個結局，可能係我死喺泰國。」
Kristie眼中的數碼遊牧三大注意事項
回望過去旅程，Kristie總結出三大要點，給有意開始遊牧旅途的人們參考。
「第一，面皮要夠厚。拒絕人唔係咩大件事，唔係夠膽先有型。第二，人在外地，可能要買份醫療保險。第三，要確保有充足嘅財務儲備，例如預估當地每月消費係幾多，再將佢乘大6倍，計吓自己乜都唔做都生存到嘅安全網。」
全球50多國設數碼遊牧特別簽證
現在，全球亦推出許多專為數碼遊牧而設的產品，像是遊牧醫保、電話咭，甚至有50多個國家都開放特別簽證，申請人只要證明到自己有穩定月入，入息達某個數字，就可以旅居當地一兩年。
不過，收入不穩正正是遊牧的最大難題之一，Kristie就這樣形容自己的收入：「我會話是『comfortable』，即係佢未去到令我去超市買嘢要睇住銀包，睇吓有冇減價先買。」不過，她坦承很難用月入的概念去量化收入。
「如果有一段時間，你勤力少少，接到多啲job，或者你好運啲，嗰期嘅收入真係有機會高於平時正職月入。但到咗下一季，冇客搵你，或者經濟唔好，可能就要靠之前嘅積蓄。」儘管每月儲蓄不多，在Kristie眼中，遊牧帶來的體驗，是一種商業潛力，像是當自己是一隻股票，儲起無形的機遇。
「當你自己係隻股票。你買你自己嘅努力，好過買一啲不知係咩人嘅努力。All in 自己。」
Kristie｜28歲香港人、數碼遊牧
不過，有機會投資自己並非必然，而是時代進步、家庭社經狀況的映照。隨著華人社會的家庭包袱相對放輕，加上個人主義抬頭，現代的數碼遊牧終可踏著較為平坦的土壤，為夢想說走就走。
「我覺得呢一代人其實有幸福嘅點，好多人比起我們父母嗰一輩，對屋企嘅責任相對少咗。譬如我問我阿媽，點解你當初入行做護士，她唔會答我『我夢想就係要救人』，事實係『收入都幾穩定』、『嗰時全屋人等我養』。但呢一代人，你好少聽到人咁講。」
古人從遊牧定居到城市，城市人卻走回遊牧之路，看似歷史輪流轉，背後卻是近萬年科技同社會的進步。到底坐在寫字樓工作好，還是行萬里路？其實都要靠自己設計出人生路。
【更多「成功靠自幹」系列人物訪問報導】
【世界各地KOL生意經】
美國另類「睇樓KOL」 闖香港 170呎灣仔劏房走到月租6萬豪宅
數碼遊牧（Digital Nomad）FAQ常見問題
「數碼遊牧」是種新時代的工作模式，由日本專家牧本次雄在1997年提出。「數碼遊牧」一詞中的「數碼」 是指憑藉網絡通訊，與全球客戶溝通；「遊牧」即是以前古人坐在馬背上，邊跑邊吃，自給自足的生活形態。
今年28歲的港人Kristie回望過去旅程，Kristie總結出三大要點，給有意開始遊牧旅途的人們參考。「第一，面皮要夠厚。拒絕人唔係咩大件事，唔係夠膽先有型。第二，人在外地，可能要買份醫療保險。第三，要確保有充足嘅財務儲備，例如預估當地每月消費係幾多，再將佢乘大6倍，計吓自己乜都唔做都生存到嘅安全網。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
