香港特區政府前財政司司長曾俊華近日在社交媒體透過電影《金手指》分享了他對香港金融中心地位的看法，指出當年佳寧案嚴重破壞了香港的聲譽，並促使政府進行了全面的金融改革。他強調香港的金融中心地位來之不易，並提到了香港的優勢和面臨的赤字問題。
曾俊華強調，香港的國際金融中心地位來之不易，任何環節的失守都有可能損害外界對香港的信心，而了香港面臨的結構性赤字問題。他表示，要擺脫赤字，除了增加收入外，減少開支是最傳統的方法。然而，減少開支可能會影響到公務員人數和一些社會服務，這是一個痛苦且不受歡迎的措施。但如果不採取行動，香港可能像美國一樣陷入借貸困境，「要借貸度日」，反問「將呢個「還債」重擔，交畀下一代，甚至乎下幾代人，又係咪公平呢？」。
曾俊華社交媒體全文：
早幾日，我去咗睇《金手指》，捧吓本地嘅製作。呢套港產片，係取材自轟動一時嘅佳寧案，我諗資歷有番咁上下嘅老友，一定記得呢宗大案，年輕嘅朋友，恐怕對呢件事會冇乜印象，但係呢件案，我覺得可以話係，推動香港日後作為國際金融中心嘅轉捩點。
佳寧案係香港開埠以來，涉案金額最大嘅金融騙案，雖然案件喺四十年前發生，但係涉及呢宗案嘅一啲主角，包括詹培忠同林秀峰，至今仍然在世，我都認識佢哋。呢單世紀騙案，唔單止令小股民欲哭無淚，更加嚴重破壞香港作為國際商業金融中心嘅聲譽。有見及此，當時嘅政府，睇到香港有必要進行全面、徹底嘅金融改革。結果香港花咗幾十年時間，重整成個金融系統、監管制度、提高上市公司嘅透明度等等，結果令到香港可以變身，成為繼倫敦同紐約之外，第三個國際金融中心。到今時今日，我相信唔會有可能，喺香港嘅市場，再出現好似佳寧呢類案件。
香港嘅金融中心角色，連國家都珍而重之，所以喺八十年代起草《基本法》嘅時候，都特別加入第 109 條，列明｢香港特別行政區政府提供適當的經濟和法律環境，保持香港和國際金融中心地位｣，睇到北京都認為，香港保持國際金融中心地位，唔單止對香港，而且對內地嘅經濟發展，亦都係非常重要。
喺我做財政司司長嗰十年，有唔少國家嘅官員都特登嚟香港，想向我哋取經，睇下點樣先至可以成為另一個國際金融中心。我都冇吝嗇、好願意同佢哋分享香港嘅經驗。我知道後嚟有一啲地方，直頭跟埋我哋做交易所法例、稅制安排，以至金融制度，但係都冇辦法成為一個國際金融中心。事關要成為一個國際金融中心，除咗自身嘅制度安排，仲要有好多條件嘅配合，包括地理位置適中，出入自由等等。香港位處亞洲嘅中心位置，去亞洲大部分國家，都喺 5 個鐘頭以內，又係中國嘅南大門，呢個天然地理優勢，本來好多地方，恨都恨唔到。過去香港就做咗好多基建，包括起新機場，同相關接駁嘅道路基建，仲要有大量選擇，俾啲做生意嘅人，可以飛到世界唔同嘅地方，就係希望吸引更多飛機飛經香港，匯聚世界各地嘅人才，同埋做唔同生意嘅人。
另外，當然要有健全獨立嘅普通法法律制度、公開自由嘅市場，對市場友善同穩定嘅政策，唔會朝令夕改，因為生意人最著重可預知性；仲有我哋同美元掛鈎嘅聯繫匯率，可兌換嘅港元貨幣同低稅制。香港呢個國際金融中心地位，真係得來不易，如果任何環節失守，都有機會損害外界對香港嘅信心，呢個幾代人辛辛苦苦建立起嚟嘅地位，就會全面脫色。
講開又講，上個禮拜個 post，引起唔少迴響，有部分朋友對我提及，認為當局要喺支出方面「放血」有意見，仲以為我係叫政府，加大開支「放水」派錢，所以希望同大家再分享多少少我嘅睇法。
不認還需認，我哋已經進入結構性赤字嘅年代，如果我哋要擺脫「赤的疑惑」，返回《基本法》所講嘅量入為出正常狀態，除咗要諗點樣增加收入，但係事實上，每一個財政司司長，喺每一年準備財政預算案嘅時候，都會用好多心機，諗吓可以點樣增加收入，所以到今日，我係好明白，可以用嘅工具確實係唔多，而每一個工具都會帶嚟唔少痛苦，喺今日嘅情況，最傳統嘅方法，都係要向支出方面入手，諗盡辦法，點樣可以喺唔會對民生造成重大影響嘅前題下，減少開支，以前我哋叫呢啲做「放血」。
Cut 開支，意味可能會影響到公務員嘅人數，或者一啲社會服務，呢個一定係痛苦同唔會受歡迎嘅措施，之不過再唔做嘢，香港日後可能會好似美國咁，要借貸度日，呢個對現今呢代人影響有限，但係下一代又點呢？將呢個「還債」重擔，交畀下一代，甚至乎下幾代人，又係咪公平呢？
#金手指
#佳寧案
#國際金融中心得來不易
#唔係我太悲觀
#放血唔係放水Photos from John Tsang 曾俊華’s post
更多曾俊華相關報導
虛擬保險｜Bowtie總保障額突破600億 目標保持每月5%增長
林鄭宣布不連任曾俊華fb不斷update贈慶？ 同日推NFT助StartUp
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
