鄰近中俄邊境嘅黑龍江鶴崗市樓價低到出晒名，網上有傳只需1.9萬人民幣就可以喺鶴崗置業，吸引唔少外地人去當地買樓。不過真金白銀畀錢買嘅單位都未必屬於業主！近日有苦主聲稱喺鶴崗買完樓之後，發現供咗十年嘅物業居然早就被陌生人侵佔，仲要連法院都勸事主放棄間屋。
事主劉玉梅係鶴崗本地人，佢喺2011年以4,888元（人民幣，下同）/平方米嘅價格，買咗鶴崗向陽區和平家園小區一個130平方米嘅單位，當時佢貸款20萬，分10年還清，物業總價加利息合共約72萬元。後來劉玉梅去咗外地打工供樓，喺2022年7月還清房貸。
劉玉梅本來滿懷希冀咁諗住返鄉下養老，點知返到鶴崗先發現自己辛辛苦苦供完嘅單位已經被一戶姓王嘅陌生人裝修入住，對方聲稱自己係喺2019年從親戚手中買咗呢間屋。
二次交易背後涉及另一宗糾紛
王某向劉玉梅出示一份向陽區人民法院嘅證明文書，文件入面提到一名姓張嘅申請人同鑫鶴房地產公司喺經法院調解後解決糾紛，雙方自願達成和解協議：「將坐落在向陽區和平家園2號樓012708室，面積107.29平方米調換到2號樓010507室，面積130平方米，已交付到申請人張某名下。」張某就係王某口中將單位轉賣畀佢嘅親戚，而房地產公司調換畀張某嘅單位正係劉玉梅供咗10年嘅房產。
據了解，張某係喺2012年同鑫鶴房地產公司簽約購買和平家園嘅一個單位，其後開發商因為未能如期交付而被張某告上法庭。開發商敗訴後就調換咗張某嘅房源，但法院文件未有交代點解張某買嘅107平方米單位，會被換成面積較大嘅130平方米單位。
申訴一年無果 法院建議事主放棄：協調其他項目單位
劉玉梅向《每日經濟新聞》記者表示，佢已經為呢件事向法院申訴咗超過一年，但都仲未有結果。到咗9月4日，法院終於主動聯絡佢，並承諾會喺9月14日之前處理事件。
到咗9月12日，法院向劉玉梅提供咗初步方案：劉玉梅可以放棄自己供咗10年嘅單位，再由法院為佢重新協調一套其他項目嘅同等面積單位。不過呢個看似皆大歡喜嘅方案其實對劉玉梅非常唔公平：「本來小區的房子在市中心，交通方便，地段好，換的小區位置差，不知道為什麼要這樣做。」
記者曾就劉玉梅嘅情況向向陽區法院查詢，但法院院長未有接聽電話，受理法官聽到記者問及和平家園小區嘅單位，即刻表示唔方便回應。
雖然暫時未知法院會唔會再提供其他解決方案，不過有網民直言「鶴崗房子不值錢」，認為劉玉梅應該爭取全額退款，然後再考慮喺鶴崗或者其他地方置業。內地房產網站《安居客》顯示，和平家園小區內130平方米嘅二手樓標價40萬，呢個價錢比劉玉梅買樓投入嘅成本低咗一大截。假如劉玉梅可獲全額退款，再喺收到錢之後買返同小區、同面積嘅二手樓，咁佢full pay買完之後仲可以淨袋超過30萬元。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
